E caminda tabata largo pero porfin Centro di Cuido Ambiente Feliz a habri na Palisiaweg

Un lugar unda esnan cu discapacidad por bay biba - ORANJESTAD (AAN): Diabierna merdia a tuma lugar na Palisiaweg, e apertura oficial di Centro di Cuido Ambiente Feliz.

   Prome Ministro Evelyn Wever-Croes como tambe Ministro Glenbert Croes tabata presente, y a sigui con Ru Croes (presidente di e directiva) a duna un relato di e historia di Centro di Cuido San Nicolas ta bay basta aña pasa.

   E proyecto aki a cuminza haya bida Wee Ying, un dama discapacita cu a word haya mara den deposito na supermarket como cu su mayornan no tabatin un cas adecua pa e haya opvang.  Ora cu e caso ey a sali na cla, Cede Aruba hunto cu demas instancia a pensa pa hinca un proyecto den otro.

  Cede Aruba e tempo aya a duna Cornerstone Economics pa traha un Business Plan, cu a wordo yama “Maatschappelijke Business Case 24 uurs Opvang en Zorg voor mensen met verstandelijk en meervoudelijke beperking op Aruba”.  E business case aki ta e fundamento pa e Cas di Cuido, y e otro dos casnan cu ta cla y wardando pa nan habitantenan.

   E casnan aki tabata cla dia 23 di Juni 2016.  Ru Croes a lesa e resumen di e Business Case, cu ta indica cu el a wordo traha door di un Stuurgroep cu ta consisti di Fundacion Guiami, Stichting Verstandelijk Gehandicapten Aruba, Stichting Algemene Bejaardenzorg, y tambe Fundacion Ambiente Feliz, riba ordo di CEDE Aruba.

   A contesta e pregunta si un opvang di 24 ora pa dia pa muchanan cu discapacidad lo por bay wordo ricibi den e ya existente Centro di Cuido na Palisiaweg lo ta alcanzable.  E experiencia di Fundcion Guiami a mustra cu famianan adoptivo na Aruba no ta suficientemente specifica pa aloha e muchanan cu discapacidad mental of multiple, specialmente debi na falta di instalacionnan di 24 ora pa e grupo aki na Aruba.  Den pasado hopi biaha ta manda nan Curacao, dependiendo si tin espacio.

   Na luna di Mei 2017 a haya peticion di Cede Aruba pa check si Stichting Ambiente Feliz (SAF) kier haci esaki pa cay bao di nan.  SAF a dicidi mesora cu ta OK pa esey, y a traha pa adapta tur e proyecto pa e cay comfortablemente bao di nan hala, y a keda cla cu esey na Augustus 2017.

   Asina pues na 2017, Ambiente Feliz a manda carta pa Ministro di Salubridad Publico Dr. Schwengle pa splica cu SAF ta cla pa haci e proyecto bira realidad.  E scope di e proyecto a wordo amplia cu mas doelgroep pa asina haci un colaboracion mas amplio, y tin mester di sosten di comunidad di Aruba y tambe CEDE Aruba, y tambe Gobierno pa sosten financiero.

   Cu e carta a cuminza cu lobby na diferente instancia y gobierno, y CEDE Aruba tabata crucial den e fase aki di lobbying, y dia 22 di December 2017 caba a haya carta di Samenwerkende Fondsen Caribische Deel van het Koninkrijk.  Aki nan a informa cu a dicidi pa duna e organizacion di Ambiente Feliz pa duna un contribucion considerable pa e proyecto aki.

   Pero tabatin mester di mas placa, y a sigui cu e lobby.  Sociale Crisis Plan a nace na Aruba, y e proyecto a bay den esaki tambe, y a wordo man habri ricibi pa Ministro Glenbert Croes.  Tabatin numeroso reunion aki, y un mocion di Parlamento fecha 19 April 2018 a urgi Gobierno pa haci tramitenan pa e casnan bashi na Centro di Cuido por wordo poni disponible pa sirbi como vivienda pa esnan cu discapacidad multiple.

   Esaki a pone cu hopi paso a socede, y awor na September 2021 porfin el a keda full cla.

   Dialuna e casnan aki lo ta operacion, y Ambiente Feliz den proximo lunanan lo tin 2 otro cas cu tambe lo wordo habri.