Boto haya intacto na Rincon
- Ta personal di KIA a bati alarma e biaha aki
ORANJESTAD (AAN): Ta parce cu aña 2024 lo bay conoce e mesun trend cu a constata na final di ultimo lunanan di e aña anterior, esta cu tin hende di exterior cu cueste loke cueste ta busca forma pa drenta Aruba ilegalmente.
Vocero di polis, Liliana Rasmijn a confirma cu prensa, cu tabata Diaranson banda di 12:30 pm, cu cuidadornan di preso na Prison di KIA, a core yama Polis pa informa cu nan ta mirando un boto na altura di e oriya di costa di Rincon.
Esaki a pone cu Central di Polis mesora a manda unidad di Polis di San Nicolas rumbo pa eynan, y varios otro unidad a mobilisa pa e area. Como cu tin di keda vigilante pa mira si lo por topa movimento den e area, y vecindario.
E prome unidad di Polis cu a yega, a bin topa cu un boto cu a wordo ranca y poni na costa, y tambe a haya varios jerrycan.
Nan a haci un control rond den e area, pero no a topa cu nada mas. Pues kizas e hendenan indocumenta abordo ya a logra “plama” of a haya nan amigonan cu a pasa piki nan. Si acaso tabatin droga of arma abordo, esakinan lo a wordo drenta sin problema.
A check tambe riba lama si acaso por mira cualkier obheto, of kizas hende ta drief, pero esaki tabata sin resultado.
Aki por mira cu un biaha mas, e botonan aki ta logra drenta Aruba sin cu el a wordo detecta pa e numeroso Marine-Radar cu tin instala door di autoridadnan.
Toch un biaha mas, Cuerpo Policial ta haci un suplica pa cu esnan cu sa algo of a mira algo por yama e tiplijn di polis cu ta 111-41. Corda cu bo ta keda anonimo.
