Raymond Kamperveen, parlamentario di RAIZ:
ORANJESTAD (AAN) -- Parlamentario Raymond Kamperveen, di fraccion di RAIZ, a declara den entrevista cu DIARIO, cu den e presupuesto cu a caba di pasa na December, pa aña 2024, Minister di Salud ta bay sondea e posibilidad pa por baha e prima di AZV. No obstante tin un par di factor cu mester tene cuenta cu ne, entre otro e fondo mes di AZV en caso cu lo haya su mes den peligro di crash.
Kamperveen ta haya cu a yega momento di wak kico por haci cu e lista di remedi, pasobra enberdad tin remedinan cu e asegurado por cumpra, por ehemplo paracetamol, cu ta 3 florin y algo, pero tin otro remedinan cu nan ta cambia pa generico y cu no ta bay cu e persona, anto e mester haya esun cu ta bay cu ne, aunke ta mas caro.
E grandinan merece di tin un bon pensioen, disfruta di dje y uza nan derechonan tambe, segun e parlamentario. El splica cu e mocionnan aki a wordo trata den e presupuesto 2024, pero ainda AZV mester presenta su presupuesto wak si tin espacio pa esaki.
“Mester tene cuenta cu envehecemento ta aumentando mientras cu tin hopi hoben cu ta trahando pero no ta aportando den e pot y na cierto momento, si e pot di AZV mester crash nos ta bay tin un problema grandi pasobra cada yiu mester take care di nan mayornan” Kamperveen a señala, evidentemente preocupa.
