Remarcando cu Trias Politica ta na peligro
- Reaccion riba protocol DHR y OM pa suministra otro informacion
- Cartanan ta mustra cu Gobierno directamente ta mete
ORANJESTAD (AAN) E politico Otmar Oduber, lider di Plataforma Nos Pais, a yama un conferencia di prensa pa trata un solo punto: Cu nos Trias Politica ta na peligro.
El a referi na un reaccion di Prome Minister, Diahuebs cu a pasa, cual segun e politico, ta laga su persona hopi preocupa, mas cu e tabata anteriormente.
“Mi ta kere cu na e momentonan aki nos ta pone na riesgo e trias politica di nos pais, y si bo ta conoci cu kico trias politica ta nifica, bo sa cu e separacion di e podernan aki (Legislativo, Ehecutivo, Hudicial), ta core riba diferente instituto cu ta forma parti di e trias politica aki na Aruba” Oduber a señala.
Oduber a bisa cu ora el a scucha Prome Minister, riba locual e ta haci un denuncia y tuma un reto na mesun momento, y esaki ta cu lo tin un protocol entre Departamento di Recurso Humano y Ministerio Publico unda ta suministra otro cu informacion, ora cu el a scucha den Parlamento cu atencion tambe a wordo duna na un reunion cu tin cu tuma lugar den Parlamento, e ta reta gobierno pa saca e protocol aki, segun prome minster, di aña 2005 unda ta permiti pa tin metemento di politica den e Instituto Ministerio Publico aki na Aruba.
“E hustificacion ayera, di e cartanan cu a sali publica unda cu gobierno directamente ta mete, ta puntra, ta pidi informacion riba casonan cu ta andando, of cu a termina, pa por haya instrumento pa persigui ambtenaarnan, directornan cu manera mi a menciona caba ta un cantidad di diferente departamentonan manera IASA, Warda Nos Costa, Brandweer, DIP, entre otronan, ta simplemente inaceptable”, Otmar Oduber a subraya.
El a vocifera cu tin un protocol ta existi contra Aruba su leynan, den e caso aki e “Ley Person Registratie”.
E ley aki ta proteha cada hende su derecho na informacion personal, cu no sin mas por sali for di un di e segmentonan di nos Trias Politica pero cu simplemente a wordo traspasa pa otro, ta un asunto sumamente serio. Asina Oduber a señala.
“Mi kier scucha, mi kier wak, Prome Minister divulga na comunidad di Aruba, e protocol aki. Den e carta unda señora Prome Minister, e tempo ey 21 di April, a manda y 19 di April a pidi informacion di Ministerio Publico, den henter e carta aki cu mi a publica durante henter e siman aki, cual gobierno a reacciona riba dje, ni un caminda ta haci mencion di un protocol, ni cu tin un ‘samenswerkingsregeling’ entre DRH cu Ministerio Publico, y esaki no por tampoco”, Otmar Oduber a remarca.
