Segun Parlamentario Gerlien Croes:
ORANJESTAD (AAN) Parlamentario Independiente Gerlien Croes, a comenta den entrevista cu DIARIO, cu den e temporada di vacantie aki, y di preparacion pa bay scol back, mayornan ta realiza cu gastonan di uniform, di material pa scol, schoolgeld, tur ta halto.
Y mester tene cuenta tambe cu den e periodo aki muchanan ta keda largo na cas, gastonan di cas tambe ta subi. Ora bo bay supermercado, turistanan ta puntra bo si tin caminda cu nan por cumpra un poco mas barata?
“Bo ta realiza bo mes cu localmente, y esnan cu ta bishita nos, ta sintiendo e efecto cu pueblo ta bibando algun aña caba! Aruba ta hopi caro. Na Aruba pa fin di luna ta dificil pa bisa cu bo ta warda un extra, pasobra no tin extra. Bo tin cu paga locual cu bo tin, pa wak si yega mes pa cubri bo necesidadnan basico.
Y pa bo wak con gobierno ta gasta placa, con gobierno ta presenta un presupuesto unda cu e si ta gasta cien y pico miyon extra atrobe”, Gerlien Croes a bisa.
El a ilustra su opinion bisando cu na 2023, segun cifranan di CAft, e gastonan di personal tabata tabata 457 miyon; nan a subi’e pa 484 miyon e aña aki y e ta bira 508 miyon, kiermen den dos aña di tempo 51 miyon extra na gastonan di personal. Pero e gastonan aki ta dunando un miho servicio? Nos ta wak e resultado pa pueblo? Por mira cu gobierno ta dunando un miho servicio pa comunidad y nos por wak cu tin cambio den e departamentonan? Si bo ta inverti e placa aki, dal bay, pero esey no ta loke na e momentonan aki nos ta experienciando como pueblo, y esaki ta e realidad di Aruba.
