Organisacion 'Lead2Success' internacionalmente honra pa trabaonan di impacto social

ORANJESTAD (AAN)- Den e sfera di liderazgo, e habilidad pa eherce influencia social ta surgi como uno definitivo.

Fuera di autoridad tradicional, lidernan efectivo ta reconoce e poder di influencia social, ta fomenta colaboracion, y ta dirigi organisacionnan na exito.

            Algo cu compania local Lead2Success sigur a bin ta haci desde nan fundamento na aña 2018. Funda pa Coach Francis A. Groeneveldt.

            Motibo cual tambe Lead2Success a keda honra como un di e organisacionnan top den entrenamento transformacional a nivel mundial pa e organisacion ‘Successful Living Summit’ (SLS). Esaki a tuma luga durante nan evento di liderazgo anual cu e aña aki a tuma luga den Mexico City, Mexico.

            SLS ta un Experencia di Liderazgo Transformacional diseña pa mehora e calidad di bida den areanan manera carera, relacion, comunicacion, amor y famia. Funda y crea pa keynote speaker Ever Miranda—un lider di negoshi y Inversionista. SLS, ta forma parti di e red internacional di Maxwell Leadership di conocido experto y orado di liderazgo John C. Maxwell.

            E evento a conta cu presencia keynote speakers, Ever Miranda y Nick Vujicic -  conocido orado motivacional cu síndrome di Tetra-amelia - un trastorno raro caracterisa pa e ausencia di tur dos brasa y pia, kende a nenga di laga su circumstancianan definie.

            “Esaki no ta algo cu mi a spera,” Coach Francis A. Groeneveldt ta duna di conoce. “Ora nan a yama mi dilanti, mi a keda den shock. E tabata un experiencia hopi humilde y muestra di aprecio pa cu tur e esfuerzo cu nos a bin ta haci. Toch di un of otro manera, kisas bo no ta wordo reconoci na bo mesun pais, otro si ta reconoce bo pa bo trabounan cu bo a bin ta haci,” Groeneveldt a expresa.

            Durante e mesun encuentro aki tambe Lead2Success a keda oficializa como e representante oficial di SLS pa henter e area di Caribe.

            “SLS tin respaldo di Maxwell Leadership como tambe, keynote speakers manera Nick Vujicic y otro aña tambe lo uni Jairek Robbins, yiu homber di conocido Tony Robbins. Mi ta sinti mi honra di por forma parti di SLS y hiba e siguiente nivel di curso y transmormacion y liderazgo den Caribe,” Groeneveldt a termina bisando.