Meredith Pabon-Ras ta empleado di luna di juni na HOH

Cu tremendo experticio y talento pa su trabou

ORANJESTAD (AAN):  Nurse Meredith a keda sumamente sorprendi ora el a drenta bek clinica di dialisis despues di haya un recorido na e edificio nobo di HOH Academy. Durante e recorido coleganan a core decora y prepara pa su yegada bek. E no a sospecha nada y a keda masha emociona di a mira tur colega, famia y miembronan di Hunta di Directiva hunto ta grita ‘surprise’! E dia aki, e dia cu ela sali empleado di luna na HOH, ta sigur un dia cu nunca e lo lubida. 

            Meredith Pabon-Ras ta labora na HOH como nurse na departamento di dialisis desde aña 1996. Ela cuminsa su carera na HOH y keto bay ta stima su trabou. E tin hopi experiencia y ta comparti esaki door di guia studiante y coleganan nobo. Su manera di traha ta hopi profesional y como cu e ta un persona hopi habri, por acerca Meredith pa conseho di cualkier aspecto di trabou. E ta un tremendo team player cu comprension pa otro y coleganan semper por conta riba dje. 

            Meredith ta un colega hopi responsabel cu tin e interes di su pashentnan na pecho, ehecutando su trabou cu hopi amor. E ta gusta duna guia y yuda su pashentnan biba un calidad di bida mas halto cu por door di duna apoyo moral y emocional y alabes educa nan tocante nan enfermedad.

             Meredith ta un persona cu gusta siña y educa su mes. E ta tuma tur oportunidad cu HOH ofrece pa desaroya su mes y asina mehora continuamente e calidad di su trabou. Ademas, e ta comparti esaki cu coleganan pa asina eleva ful departamento tambe. E ta preciso den su trabou y tin talento pa paga tino riba detayenan chikito y p’esey hopi biaha e ta encarga pa haci evaluacionnan. Ademas, e ta un colega proactivo cu ta tuma iniciativa y no ta para keto te ora hunto yega na solucion. 

            Un colega ehemplar y dedica na su profesion, esey ta Meredith. Su talento, experticio y compromiso pa continuamente mehora e departamento ta impresionante. Hunta di Directiva, management y coleganan ta hopi contento y orguyoso di tin Meredith den team HOH. Masha pabien Meredith cu e bunita titulo di empleado di luna di juni 2024!