ORANJESTAD (AAN): Durante e reunion publico di diahuebs mainta den Parlamento di Aruba pa trata COHO, Prome Minister Evelyn Wever-Croes a finalisa su disertacion gradiciendo Parlamento
pa e sosten den e trayecto di negociacion durante e ultimo 13 lunanan cu a pasa. Tambe Prome Minister a enfatisa e fortalesa di nos pais pa busca ayudo den tempo cu mas nos tabata tin mester.
“Nos ta na un punto hopi crucial aworaki. Gobierno a haci di su parti, no su so pero constantemente informando Parlamento. Nos a bin mas di 10 biaha Parlamento durante e ultimo 13 lunanan aki pa splica con tur cos ta andando. Nos a hiba numeroso encuentro cu stakeholders pa nos splica kico ta pasando y purba haña un gevoel di kico nan ta pensa di e topiconan aki y tene na cuenta e input di cada persona. Nos a haci esaki danki na e sosten cu nos a haña di Parlamento.
Pronto Gobierno ta pasa e producto final den man di Parlamento pa nan tuma un decision final riba dje. Mi kier gradici tambe esnan cu a yuda nos den e negociacionnan aki. Un danki di curason. Danki mi colega Ministernan cu a duna nos espacio y compromiso tambe pa nos por a yega na e palabracion aki pasobra e no ta facil”.
Prome Minister a enfatisa, cu ora un gobierno tin vision, determinacion y curason pa su pais, e por logra cosnan grandi. Gobierno no a core firma apesar di tabata tin hopi presion pa firma. Gobierno no a bay busca pelea, rabia y lanta for di mesa bay. Gobierno no a pone cara di Aruba na berguensa. Pero Gobierno a para firme y manera cu e Arubiano cu ta stima nos pais Aruba, asina Gobierno a negocia pa saca e miho producto posibel.
“Nos a lora manga y nos lo sigui lora manga pa asina saca Aruba di e crisis aki. Tin biaha tin hende ta considera cu ora bo ta busca ayudo ta pasobra bo ta debil. Ami ta considera cu ora un pais busca ayudo, e ta un pais fuerte den tur sentido di palabra. Aruba a demostra cu nos tabata tin mester di ayudo pasobra nos so no por a sali afor ora Covid a dal nos. Nos a mustra firme y forsa pa nos a bay busca ayudo y berdad nos a dal stapnan atras pero cu e producto cu nos tin riba mesa awe, e palabracionnan haci cu Hulanda, ta palabracionnan realistico. Mi ta sigur cu e stapnan cu nos a dal atras, den poco tempo nos lo dal stapnan hopi grandi padilanti pa hiba nos pais den e recuperacion cu nos tur ta desea”, Prome Minister Evelyn Wever-Croes a expresa.
