Eleccion a entrega prueba di manipulacion cu derecho sagrado di Pueblo - *AVP ta busca rason cerca Huez cu votonan secreto den su man - *Cualkier ciudadano lo tabata den prizon cu portretnan uza dor di AVP
ORANJESTAD(AAN)—Cualkier ciudadano cu a mustra otro un portret cu awe AVP a presenta den sala di Corte, lo a core e riesgo cu e lo a wordo detene dor di Polis pa duna cuenta y razon di e forma cu e portret a cay den su man.
E ultimo caso den cual AVP ta envolvi, ta corona tur e otro casonan den cual e partido ta envolvi y sigur ta papia di necesidad pa autoridad actua y duna prueba cu no tin ley di clase na Aruba.
E cara pinta di Mike riba un formulario secreto, awe ta prueba di manipulacion cu e derechonan sagrado di Pueblo di Aruba y autoridad mester pone un punto final na un desaroyo cu ta duna tur indicacion cu Aruba a drenta ambiente di dictadura abierto di parti di AVP.
Pa increibel cu e por parce, den Corte di Husticia Huez mester a atende cu e hecho cu ora un ciudadano a bay vota, el a dicidi pa no solamente yena e circulo dilanti nomber di e politico pa kende e kier a vota.
Den e caso aki, Huez mester a atende cu un ciudadano cu pa un motibo of otro a dicidi cu e ta uza e potlood cora pa tapa e cara di Mike Eman tambe y asina a haci su voto invalido manera ley ta bisa den e caso aki.
Normalmente nunca Pueblo lo descubri cu un votador a dicidi cu e ta bay cubri cara di Mike Eman riba su formulario di voto, cu e color cora di su potlood.
Sinembargo, e voto secreto mas cu noticia, a wordo presenta tambe den Corte di Husticia y ta parti di e sentencia di Huez den e caso cu AVP a cuminsa pa logro un reconteo di voto.
Loke sin duda Aruba mester ta un reconteo di e casonan contra Ley di AVP, cu awor si a kibra record.
E cara pinta di Mike Eman a wordo trata den Corte di Husticia pa medio di portretnan cu AVP tin na su disposicion di formulario di voto di ciudadanonan di Aruba, cu por tuma nota con leo AVP ta yega.
Huez a cualifica e portretnan como hecho castigabel, pero awor mester bini un punto final na e cantidad di casonan castigabel cu AVP ta comete.
Eleccion a duna Pueblo di Aruba atrobe prueba di manipulacion cu Pueblo di parti di AVP, cu ta insisti cu e mester ta den gobernacion. Awe e pregunta grandi ta, pakico!
Kico ta e motibo cu AVP mester ta den Gobierno? Pa e por paga of no paga votadornan pa e hecho cu nan a vota? Un asunto cu no ta DIARIO ta trece dilanti, pero Huez a bisa ta resultado di e hecho cu ta saca portret di votonan.
Kico ta e motibo cu AVP mester ta den Gobierno? Pa personanan cu a duna prueba, cu portret, cu nan a vota pa AVP haya un of otro fabor?
Loke a keda proba den Corte di Husticia di Aruba y cu Huez a yama acto castigabel, awor mester tin resultado pa AVP.
Si e portretnan a wordo saca dor di hende huramenta den e proceso di eleccion, con nan por a resulta den man di AVP? Si un persona cu a representa AVP na e urna electoral a mira e portret, cu e no por a saca, con a logra pa e portret a bira publico?
Awe e cara pinta di Mike Eman riba un formulario cu mester tabata secreto di voto, ta wordo discuti den sala di Corte di Husticia pasobra e ta un voto invalido, cu AVP a dicidi di pone banda di un voto riba nomber di otro candidato di otro partido.
Cu otro palabra, AVP tin informacion secreto, cu ta un hecho castigabel.
Autoridad mester actua. Si cualkier persona a haci loke AVP a haci, e lo wordo detene y cera.
DIARIO ta pendiente di desaroyonan den otro caso bochornoso cu AVP ta produci pa demostra e dictadura cu hasta na urna electoral a manifesta su mes.
