Mañan Diadomingo
ORANJESTAD (AAN) Mañan Diadomingo e “Open Monumentendag” lo tuma lugar, unda cu 13 edificio historico y monumentonan den Oranjestad, lo habri nan portanan pa publico.
Mircla Nava, PR Marketing di Stichting Monumentenfonds, a duna informacion tocante e evento aki, den entrevista cu DIARIO. El a invita henter pueblo di Aruba pa bin e dia aki den famia. Tur alumno di scol preparatorio y basico a ricibi un “Monumenten passport” na scol, y cu esaki nan ta bin na e open dag di cada edificio y na final lo yega na edificio di Post Aruba, cu tambe lo habri di 10 or di mainta pa 3 or di atardi pa duna rondleiding, y pa duna informacion tocante historia di Post. Tambe lo tin actividadnan pa mucha, y asina di 3’or pa 5’or, riba e stacionamento di Postkantoor lo tin e clausura di e evento, unda nan lo parti diferente premio pa esnan cu a participa den e actividadnan, durante e dia y disfruta di musica di un di e gruponan local cu ta hopi gusta.
“Nos ta pidiendo tur hende pa registra na Weststraat pa cuminza eynan, unda e publico ta haya foyeto di informacion, y bo ‘foto bingo’ pa participa cu ne. Di akinan por bishita e monumentonan den e secuencia cu bo ta desea”, Nava a informa.
Lo tin boluntarionan den cada monumento y cada un tin diferente actividad, entre otro actividadnan pa mucha, festival di sopi, sport touch, e famia Ecury mes lo ta dunando informacion, y bishita e diferente monumentonan cu museo ta consisti di dje. Tin e museo di Meta Corp cu ta habri pa prome biaha, por wak Cas di Brenchie unda por admira e mueblenan original, y asina cada un tin su diferente atractivonan, y nan manera di presenta nan monumento. Tin un edificio tambe, Cas Debrot, y eyden tin un exposicion cu ta conta historia di transporte na Aruba, y hunto cu Cas di Cultura lo pasa un documentario di memoria ancestral.
E recorido lo tuma for di Weststraat te Wilhelminastraat banda di Cas di Brenchie, pues ta un distancia basta largo. Nava ta aconseha si tin persona cu tin problema cu canamento, miho bay den auto na e diferente eventonan. Lo tin un waterpost na Ooststraat y ta pidi tur hende pa bin cu nan boter pa yene eynan. Corda riba protector solar y bisti keds of zapato confortable pa cana.
