ORANJESTAD (AAN): Aruba Conservation Foundation, encarga cu e.o. Parke Arikok, ta contento di por colabora cu Universidad di Aruba y NHL Stenden dentro di e 'Destination in Transition (DIT)' minor.
Studiantenan lo bay aplica diferente formanan di pensa innovativo pa crea strategia y accionnan pa transforma Hofi Fontein den un experencia di conscientisacion, aliniando tamba na e 'UN Sustainable Development Goals (SDGs)'.
Recientemente, e fundacion local a haya e oportunidad pa sera conoci cu e studiantenan y introduci nan na Aruba Conservation Foundation (ACF). Asina tambe introducinan na nos 'Multi Annual Corporate Strategy (MACS) 2023-2032, unda nos ta describi nos compromiso pa conserva Aruba su herencia natural y cultural. E curiosidad y preguntanan atento a inspira e fundacion, y nan ta contento di por mira nan interes pa conserva nos naturalesa.
Mirando ACF su transicion di un organizacion tradicional di maneho di parke pa uno di maneho di conservacion, nos ta agradecido pa por tin e oportunidad di atrae e siguente generacion den nos esfuersonan di conservacion. Pa asina crea balor pa nos bishitantenan y den mesun momento forma relacionnan local y internacional pa refuerso.
Den nomber di naturalesa, nan ta gradici e grupo, y ta desea nan tur clase di exito den e siguiente 9 simannan di e programa.
