Oficina di Turismo for di basta tempo tabata tin su bista riba ex edificio di DOW

Ronella Croes, CEO:

ORANJESTAD (AAN): E ex edificio di DOW na Playa porfin ta bay haya otro uso, esta e ta bay wordo uza pa ATA y APA.

Despues cu minister di Turismo y Salud Publico Dangui Oduber a duna un splicacion di e proyecto, CEO di ATA, Oficina di Turismo, Ronella Croes despues di cana rond den e edificio a bisa cu tabata hopi bunita pa wak con e edificio ta di paden , mirando e potencial grandi cu tin.

“ATA for di hopi aña patras caba tabata envolvi y tabata tin nos mira riba e edificio aki”.

Ta asina cu algun aña pasa caba ATA a traha su plan di analisa posibel mudamento di nos oficina pa e edificio aki.

E tempo ey tabata tin diferente motibo pakico nos a scoge e edificio aki.

E lo a permiti nos contribui cu restauracion di un monumento na Aruba y nos a tene cuenta cu e hecho cu e ta asina centralmente ubica, permitiendo nos tambe pa facilita y duna mihor servicio na nos bishitantenan, pero tambe e lo a cuadra cu locual nos ekipo tabata tin mester na e momentonan ey, segun Croes.

El a bisa cu e tempo ey no a concretiza esaki, pero e motibonan pa tin e desea di ta envolvi si a keda vigente.

“Nos exigencianan a cambia y e rekisitonan di kico tin mester ta diferente, mientras cu nos ta contento cu APA ta tuma e edificio over”.

“E deseo di por mira e edificio aki restaura tambe, ta keda algo hopi importante pa nos”, segun Croes, kende a indica cu ATA ta contento cu den e edificio nan lo haya un asina yama ‘Visitor Information Center’.

El a splica cu esaki lo permiti ATA brinda tanto e turista di crusero como tambe esunnan cu ta bin cu avion, hopi informacion.

ATA ta bay traha un acuerdo cu Aruba Ports Authority (APA), pa asina huur e parti di edificio aki cu lo wordo uza como e Visitor Information Center.