Oficina Central di Estadistica ta confirma cu prijs di coriente a keda mescos keto bay

ORANJESTAD (AAN): Desde Januari 2020 te cu awor... e tarifa y awa y electricidad na Aruba a keda mescos!  Pues percura pa bo no kere ningun hende cu bin bisabo cu prijs di coriente a subi!

   Mas bien, e persona ey mes tin di bay check cu su consumo a subi!  Kizas e ta lagando airconan na cas cendi mas hopi, y cu e tempo calor aki, e compressor ta sigui traha hopi mas largo, y ta gasta mas coriente.

   E siman aki, Oficina Central di Estadistica ta confirma cu keto bay e prijs di electricidad y awa na luna di Juni 2021 no a cambia compara cu Mei 2021.

   Prijs di electricidad y di awa no a cambia compara cu Mei 2021. Consecuentemente, e prijs promedio di electricidad pa vivienda a keda Afl. 240.09, mientras cu e prijs promedio di awa pa vivienda a keda Afl. 137.05.

Prijs di gasolin a registra un subida di Afl. 3.70 cent (1.7%) na Juni 2021 y a causa un efecto di 0.08 ppt riba e Indice Prijs di Consumo (CPI).

   Mientras tanto, e relato oficial di Oficina Central di Estadistica ta indica cu e prijs di utilidad (electricidad y awa), gasolin y diesel ta worde determina primordialmente door di e prijs internacional di petroleo. Na Juni 2021 e prijs promedio pa bari di petroleo (US$ 70.97) a conoce un subida di US$ 5.80 (8.9%) compara cu Mei 2021 (US$ 65.17).

   Prijs di diesel a registra un subida di Afl. 8.40 cent (4.8%) na Juni 2021 y a causa un efecto di 0.01 ppt riba e CPI.

   Juni 2021, utilidad, gasolin y diesel como grupo, tabata tin un subida di prijs di 0.6% compara cu Mei 2021 y hunto tabata tin un influencia di 0.09 ppt riba e CPI, mientras cu e restante 404 bienes y servicio hunto, a conoce un subida di prijs di 0.7% tabata tin efecto un efecto di 0.62 ppt riba e CPI.