ORANJESTAD (AAN) – Guillermo Salinas, Presidente di e “Fundacion Fiestas Patrias, Peruanos en Aruba”
a duna un discurso cortico, den e ceremonia di conmemoracion di e Independencia di Republica di Peru, cu a celebra su Bicentenario di Independencia dia 28 di Juli aki.
El a expresa: “E 28 di Juli di 1821 ey, den cual a proclama nos ser liber y independiente, tabata un epoca cu nos tabata tin dos coriente: coriente di noord y coriente di zuid. E coriente noord tabata bao e orden di Simon Bolivar, y e coriente zuid tabata bao e orden di Jose de San Martin cu ta ken a independiza nos.
“ Pero nos tin presente y ta recorda Simon Bolivar, pasobra el a pone e punto final den e Batalla di Ayacucho, un 9 di December di 1824”, Salinas a subraya, gradiciendo e palabranan di Luis Zarraga y tambe e presencia di e personanan presente durante e ceremonia aki.
Finalmente, señora Teresa Vianey Lujan, Vicepresidente di e fundacion a clausura e ceremonia expresando palabranan di gradicimento na Minister Glenbert Croes cu semper tey pa e residentenan Peruano, na Luis Zarraga pa su palabranan, Pastor Iglesias y tur presente, y a termina sclamando: “Biba el Peru”!
