Obranan di Gustave Nouel a ser poni den Buki Nacional di Artista di 2026 na Hulanda

E famoso ‘street-artist’ di Aruba...

ORANJESTAD (AAN): Gustave Nouel, ta bibando na Deventer na Hulanda, y el a caba di bira e unico artista reconoci di Deventer cu NABK (Asociacion Nacional di Artistanan Visual) a invita pa su arte wordo inclui den e Buki Nacional di Artista di 2026, conoci como “Jaarboek kunstenaars 2026”.
   Riba pagina 130, Gustave Nouel ta comparti un foto di su “Homenahe na Rembrandt Intemporal”, un pintura di tamaño natural cu ta mustra su persona riba un beach den ‘paraiso’, teniendo un “pintura  contemporaneo cu materia”, casi abstracto, inspira pa un zelfportret intemporal di Rembrandt.

   Den region, Gustave Nouel ta realisa frecuentemente su performance ‘Oda na Rembrandt’ (algo cu e tabata haci hopi den su hubentud) como “street-artist”, pero awor hunto cu alumnonan di DAK (Deventer Amateur Kunstenaars).  Por ehempel como invitado di  fundacion “Kunst en Cultuur aan de IJssel” (Arte y Cultura na IJssel) y na Apeldoorn, como invitado di galeria ArtFra. Na Deventer,  Gustave Nouel ta disfruta comparti su experiencia cu artistanan interesa.
   Desde siglo pasa, Gustave Nouel a duna workshops di sketch y pinta portret riba caya y tambe duna performance Oda na Rembrandt, tanto nacional- como internacionalmente, .

   Proyectonan na Indonesia: Na Indonesia, Academia di Arte ISI di Bali (Denpasar) a mustra interes pa su workshop y performance/demostracion di pintura Oda na Rembrandt pa nan studiantenan.

   Señora Mi Komang Artini (Unidad di Relacion Publico y di Cooperacion) di e Academia di Arte a propone un futuro exposicion di Gustave Nouel na Academia ISI.
   Sr. Ketot Kariasa, curator di ARMA Museum & Resort, tambe ta desea workshops di ‘street-portraits’ na museo ARMA y performance  ODA NA REMBRANDT. di Gustave Nouel.

   Tambe un exposicion individual di Gustave Nouel a ser proponi na museo ARMA. E maestra/guru Greis Keagow, ta representante y ‘partner’ di Gustave Nouel na Indonesia.

   Museo na Aruba: Desde siglo pasa, artistanan na Aruba ta soña cu un museo pa arte local/internacional.

   Varios intento diferente hende a fracasa. Gustave Nouel ta spera cu na 2026 lo logra un formula pa e soño aki por bira realidad. Morochonan Stanley y Clayton Brown varios aña caba ta purba yuda establece un museo serio, caminda arte di Gustave Nouel por yuda habri portanan pa mas artista di Aruba. Nan ta convenci cu e experancia, calidad artistico y reputacion di Gustave Nouel por duna un impulso den bon direccion.

   Pa cuminsa cu un museo serio, apoyo di ATA (Autoridad di Turismo Arubano), DCA (Direccion Cultural di Aruba) y mas stakeholders ta importante.
   Desde siglo pasa pintura di Gustave Nouel a ser inclui den diferente coleccion particular y oficual, di museo y di instituto di arte na diferente tera/pais. Gustave Nouel a realisa mas di 200 exposicion internacional riba tur nivel. Ademas, hopi hende ta considere e ‘Rembrandt di Aruba’, parcialmente pa su performance di pintura ‘Oda na Rembrandt’, cu Gustave Nouel ta comparti cu publico (tanto nacional como internacional), riba tur nivel, desde siglo pasa.

   Gustave Nouel a ser invita pa un proyecto na Aruba, luna di februari, 2026. Su presencia durante algun siman tambe lo por stimula mas proyecto artístico na Aruba y den Caribe.