Nicole Hoevertsz: --- ORANJESTAD(AAN): Despues di hopi preparacion, diadomingo awor dia 20 di Maart lo tin e prome edicion di ‘One Healthy Day’.
E partinan mas importante ta cu e ta accesibel y gratis.
Mundo y naturalmente den Caribe Hulandes, ciudadonan a cuminza bira mas conciente di con importante e ta pa biba un bida saludabel.
Esaki ta exactamente e objetivo cu e festival aki tin pa asina por uni y inspira nos comunidad pa ta mas pro-activo pa nan salud.
One Healty Day ta inclui tur hende y no ta mira limitacionan mental of fisico, ni tampoco
edad.
Durante un conferencia di prensa Diaranzon mainta na Cas di Cultura presidente di Comite Olimpico Arubano Aruba (COA), Nicole Hoevertsz a hiba palabra y a bisa cu ta un placer enorme pa COA forma parti di e evento aki.
“Ora cu mi a scucha di e evento y cu ta bay tin un dia henter dedica na salud di hende y dedica na motiva hende pa participa activamente na un cantidad di evento cu tin di haber cu deporte, movecion, salud mental y tur tipo di actividad fisico, COA dimes kier a participa”.
Nos invitacion ta pa henter pueblo di Aruba, sali for di boso cas Diadomingo y realmente forma parti di tur e actividadnan, cu ta bay tuma lugar rond di henter Aruba, segun Hoevertsz.
El a sigui bisa cu salud fisico y mental ta responsabilidad di e persona mes, sigur si e oportunidad wordo ofreci.
“Nos ta spera cu un dia manera Diadomingo lo motiva hende pa cuminza practica un deporte, cual sea cu ta”, segun e presidente di COA.
