Mientras mundo ta bati alarma pa posibel recesion mundial severo --- *Na inicio di conflicto DIARIO a adverti cu e Indian y Ruso ta primo --- *Segun Gobernador Dunleavy, Alaska bon arma ta spera yegada Rusia
ORANJESTAD (AAN) — Ayera mundo tabata sigui basha abou y instancianan oficial a adverti cu si e prijs di petroleo keda halto, mester tene cuenta cu un recesion cu por afecta poder di compra di henter mundo.
Mientras e prijs di petroleo a baha, el a keda halto compara cu 2021 y e proyecccion tabata cu na 2022 e prijs lo keda den vecindario di 100 Dollar pa bari.
E Acuerdo di Clima tabata parce moribundo y peliger serio pa e nivel di bida mundial tabata wordo expresa mientras e ruido di un intensificacion di guera tabata mas fuerte cu e posibilidad cu Rusia y Ukraine lo topa otro.
Ta ayera tambe, mundo a wordo sorprende cu e declaracionnan di un Miembro di Duma, e loke mester ta representacion di Pueblo den e varios partinan di Rusia.
Na inicio guera na Ukraine, DIARIO a splica Aruba cu mientras na e frontera entre Rusia y Europa Merca ta duna sosten, na e Oceano Pacifico, Merca y Rusia por mira costa di otro.
DIARIO a splica cu si sigui historia e Indian Mericano y e Ruso di Siberia, tin mes descendencia. Na e sitio cu ta wordo yama “Fin di Mundo” na Polo Norte, habitantenan di e paisnan conoce nan historia y por wordo considera primo.
Ayera e politico Ruso Oleg Matveychez, na television di estado di Rusia, a papia di e hecho cu no ta solamente Ukraine por ta e demanda di Rusia.
El a papia di e Imperio Ruso, cu den uno di nos edicionnan nos a presenta como e ilusion di Vladimir Putin, cu ta di opinion cu ningun pais por tin e poder mundial cu Rusia tin.
Den su relato el a presenta e pensamento cu no ta Ukraine so mester ta parti di Rusia, pero cantidad di otro teritorio cu un tempo tabata parti di e Imperio Ruso.
Na e momento el a hiba mundo atrobe na e situacion durante Siglonan 18 y 19, tempo cu Alaska tabata parti di Rusia pero a wordo cumpra dor di Merca pa 7.2 Miyon.
Esaki a haci cu awe Alaska ta teritorio Mericano dilanti costa di Rusia na Oceano Pacifico.
Pa e Gobernador di Alaska, e Republico Dunleavy, e declaracion di e politico Ruso, tabata un declaracion di guera, cu el a contesta imediatamente.
El a mustra cu Alaska ta bon prepara pa Rusia y tin Miles y Miles di militarnan bon entrena pa defende e teritorio Mericano cu ta situa entre Oceano Pacifico y Canada.
Dunleavy a haya atencion internacional na momento cu Shell a bandona Rusia y el a bisa Shell cu na Alaska e compania petrolero tin tur oportunidad pa haci bon negoshi.
E ponencianan di anexa mas teritorio cu tabata di Rusia, tin atencion tambe di Fort Ross na California, cu un tempo tambe tabata tin mando Ruso.
E situacion mundial tin atencion total di mundo, cu ta realisa e peliger grandi di un guera mundial.
Awor bista di mundo ta dirigi tambe riba Oceano Pacifico tambe y e continente Asiatico.
