ORANJESTAD (AAN) – Minister di Turismo, Dangui Oduber, a bisa den conferencia di prensa cu por a constata cu turismo crusero no ta recuperando cu e mesun rapidez cu turismo stay over.
E mandatario a trece dilanti cu Aruba a habri su frontera pa barconan crusero apenas na Juni aña 2021, despues cu Aruba su fronteranan maritimo tabata cera, y CDC mes a prohibi pa barconan crusero cuminza navega.
Turismo crusero ta un di e industrianan cu a confronta e problemanan mas grandi, e dignatario a expresa, mirando e volumen grandi cu nan ta transporta riba cada barco crusero.
Minister Oduber a splica cu na Februari 2022, Aruba a ricibi 42.447 turista crusero y esaki tabata basa riba 39 calls. Y si compara esaki cu Februari 2019, Aruba a ricibi e aña ey 86.084 turista crusero. Kiermen, Aruba ta recuperando apenas 40% en comparacion cu Februari 2019, pero mescos cu pa loke ta trata stay-overs, ta spera un recuperacion di turismo crusero den e siguiente lunanan, unda cu poco, poco e cantidad di calls lo ta aumentando aunke no ta spera cu esaki ta 100% pero si hopi miho cu Januari y Februari ultimo. Ya caba tin hopi calls confirma, e dignatario a subraya.
