Gina Maduro, presidente di ABV: - ORANJESTAD (AAN) – Durante e conferencia di prensa di gobierno, Diabierna atardi,
relaciona cu e reunionnan concerni, cu Formador Evelyn Wever-Croes, tocante e proceso di formacion di gobierno nobo cu ta den proceso, señora Gina Maduro, presidente di Arubaanse Bond van Verpleegkindigen 'ABV' a hiba palabra y a elabora tocante e reunion aki.
E lider sindical a menciona cu pa ABV tabata un sorpresa di a haya un audiencia asina trempan, pero nan sa cu tin afspraaknan ta tumando lugar y e ta contento cu cuido a haya su prome atencion, pasobra, den nan concepto, esaki ta hopi importante.
Maduro a splica cu nan por a delibera cu Formador, riba diferente punto y riba preocupacionnan, cu tin den cuido di salud.
Nan a elabora riba e cortamento di e 5.5 florin den cuido cu tin un efecto enorme riba esaki.
Maduro a subraya cu nan a elabora tambe tocante tur e trabaonan cu e personal di enfermeria a haci durante e periodo di pandemia y kico e efecto directo tabata riba nan, trahando duro den pleno pandemia y entregando di nan salario. El a duna di conoce cu, conhuntamente, cu nan doño di trabao y tur e stakeholders ImSan, Respaldo, Bloed Bank, HOH, ta yegando na acuerdonan unda cu nan por ta solidario, pero alavez unda cu e trahadornan no sinti e efecto directo pa “betrek” nan salario, pero nan a bay mas den e efecto secundario.
Nan ta compronde cu mester keda solidario, pero tin cu wak tambe con pa sigui duna e servicio y garantiza un calidad di cuido.
Gina Maduro a subraya cu esaki tabata un bon reunion, unda cu e miembronan a haci diferente pregunta y nan a haya nan contesta. Nan bay wak kico ta pasa den futuro, pero nan ta spera cu tur cos bay bon, y tambe cu nan por traha hunto pa yega na solucionnan y mehora e cuido di salud pa e no afecta e pashent directo.