ORANJESTAD (AAN) – Den conferencia di prensa di gobierno diabierna atardi, e presidente di e Asociacion di Docternan di Cas, Dr. Joaquin van Trigt, tambe a duna su comentario tocante e reunion cu Formador, Evelyn Wever-Croes.
Van Trigt a menciona cu e reunion a bay bon, y su impresion ta cu nan a trece dilanti tur e puntonan cu ta importante pa e docternan di cas, na e gobierno cu ta den formacion aworaki.
“Mi ta spera cu nan ta tuma nos puntonan y uza nan pa nan yega na un gobierno stabil, cu lo inverti tambe den cuido, y specialmente den nos sector cu ta e prome linea di cuido.
“Aworaki, cu tur hende ta siguiendo medio, por sa cu nos ta pasando den un temporada basta duro, no solamente door di covid-19 pero tambe door di e situacion financiero cu a wordo afecta door di e pandemia, y cortamento den e gastonan di AZV, y esey tin su efectonan bastante serio pa e structura di salud y cuido y tambe pa e structura di ‘eerste lijn zorg’. Nos a trece nos preocupacionnan dilanti, pa e proximo gobierno keda den dialogo cu nos sector, y nos por purba di crea un structura cu lo por brinda toch, un cuido stabil, cu fondonan cu ta manehable pa nos fondo di seguro AZV, y un cuido cu toch ta di un nivel halto pa e pashentnan di Aruba”, Dr. van Trigt a expresa.
