Nos grandinan a celebra Dia di Hende Muhe estilo protocolar

Celebracion na St Michael Paviljoen

ORANJESTAD (AAN): Diabierna atardi, Prome Minister Evelyn Wever-Croes hunto cu Minister Xiomara Maduro y Minister Endy Croes a bishita St Michael Paviljoen, riba un invitacion en conexion cu Dia Internacional di Hende Muhe.

   E celebracion aki tabata estilo protocolar, na unda nan a bisti e damanan presente elegante cu un sombre estilo protocol, cu varios minister y parlamentario a provee. E luga tambe tabata hopi bunita decora, creando un ambiente manera ta na oficina di gobierno esaki ta tumando luga.

   Prome Minister a expresa, cu e atardi aki tabata uno hopi bunita, na unda nan como mandatario di pais Aruba, por a comparti e dia special aki cu tur e damanan, cu ta cliente di paviljoen. Nan por a disfruta e atardi aki, di un bunita presentacion duna pa Edjean Semeleer y un bunita poësia duna pa señora Ivy Goeloe. Sigur un atardi sumamente ameno cu e ser femeninonan importante aki.

   "Den nomber di Gobierno di Aruba, mi kier a gradici cada un di e damanan cu tabata presente pa tur loke nan a haci pa nos, pasobra ta danki na nan labor, awe nos por biba y lanta nos yiunan riba e pais aki, cu yama Aruba. Tambe un danki na tur esnan cu ta labora den e area importante aki, y cu ta duna cada un di e damanan aki, e bon trato cu nan merece", Prome Minister a expresa.

   Na final di e celebracion, Prome Minister a worde sorprendi cu un cuadra grandi cu tur e mannan di e grandinan riba dje. Prome Minister a expresa cu e bunita regalo aki a touch su curason, y cu e lo ta un recuerdo di e bunita celebracion aki hunto cu clientenan femenico di St Michael Paviljoen.