Nan ta preparando pa Caminda di Cruz Bibo
*Despues di siman di tentamen tin tarea pa haci
ORANJESTAD (AAN) – Gerswhin Lee, Director di Colegio San Antonio MAVO na Santa Cruz, a duna di conoce cu scol ta preparando un Caminda di Cruz Bibo.
Cabesante Lee, den entrevista cu DIARIO, a comenta cu ora tin “toetsweek” normalmente nan ta bay Santo Sacrificio di Misa, pazuid di e parokia ta bendiciona e muchanan, reza cu nan y desea nan exito. Dialuna 11 e siman di tentamen a cuminza, pero e biaha aki nan a dun’e un otro contenido bao di guia di KDA nan a tene un preparacion pa Caminda di Cruz, cu e muchanan di Eerste Klas.
Pa e muchanan di scol esaki ta algo nobo pa nan, y hopi di nan no ta custumbra cu e tipo di actividadnan aki, e no ta algo cu ta biba bao di nan, ni di nan famia, y ta importante cu scol si introduci esaki na scol.
“E ta keda un reto y scol tin un tarea hopi grandi pa haci esaki visible y trece cerca e muchanan. Pa scol ta importante mustra e muchanan cu amor pa prohimo ta importante, y pesey tur alumno di 3de y 4de Klas, mester haci trabao boluntario e fin di siman cu ta bin, y tambe den temporada di cuaresma. Nos tin mas di cien mucha cu ta haciendo trabao boluntario, entre otro cu Aruba Doet.
Mi tin mas di 80 mucha cu lo yuda den Colegio Arubano pa trabaonan cu nan ta pidi ayanan, y esaki ta trece e caracter Christian di scol, amor pa prohimo, yuda un otro y tambe den e temporada di cuaresma aki dilanti”, cabesante Lee a duna di conoce.
E director di Colegio San Antonio a sigui bisa cu tur cos ta cuminza na cas. “Bo tin cu wak cierto norma y balornan cu ta importante den Iglesia Catolico pero tambe den famia. Hopi hende ta ekivoca nan mes di pensa ‘e ta hopi leu di mi, algo aheno na mi’ pero e ta hopi cerca. Manera mi a indica, stima bo prohimo, yuda otro hende ta un bon persona caba, algo hopi importante cu abo como persona por contribui na dje” Cabesante Lee a bisa.
{gallery}Colegio San Antonio ta fomenta bao alumnonan trabao boluntario, stima bo prohimo{/gallery}
