Parlamentario Evelyn Wever-Croes:
Raad van State ta confirma cu HOFA ta limita autonomia di Aruba
ORANJESTAD (AAN): Dialuna mainta, e conseho di Raad van State riba ley di Reino HOFA a ser publica na Hulanda cu ya desde siman pasa a ser emiti. Raad van State ta e instituto cu ta duna conseho riba leynan di Reino.
Ex-Primer Ministro Evelyn Wever-Croes y actual Parlamentario di Fraccion di MEP, ta sostene cu e conseho di Raad van State di Reino Hulandes ta confirma loke e y otro criticonan di HOFA a bin ta adverti durante e ultimo lunanan, esta cu e ley ta implica un limitacion di autonomia di Aruba. Segun Wever-Croes, tanto Raad van State di Hulanda como Raad van Advies di Aruba a yega na e mesun conclusion aki.
“Nos a bolbe haya razon. Esaki ta loke nos a bin ta bisa desde augustus aña pasa. Esaki ta loke Partido MEP y Fraccion di MEP ta bisa, Fraccion di PPA ta bisa, Parlamentario Mike de Meza di Fraccion di AVP ta bisa, varios profesional y experto riba e tema ta bisa, Sindicatonan tambe ta bisa algo similar, y mas di dies mil firmante ta bisa asina. Nos tur ta contra ley di Reino HOFA pasobra e ta mishi y ta limita nos autonomia”, Parlamentario Wever-Croes a remarca.
El a expresa cu MEP ta satisfecho cu a conseho di Raad van State y ta spera cu lo bin un punto final na e discusion cu si e ley di Reino HOFA ta mina of no autonomia di Pais Aruba.
E parlamentario a menciona cu Minister di Finansa y Economia señor Geoffrey Wever, kende segun Wever-Croes, ta e unico den Gobierno AVP Futuro cu ta papia riba e tema di HOFA, ta bayendo di gremio pa gremio, reuniendo cu nan den secreto y ta informa nan cu e ley aki no ta mishi cu autonomia di Aruba mientras cu te hasta e ta bagalisa autonomia di Aruba dunando e idea cu MEP ta haciendo algo cu no ta realistico.
Y awor, Raad van State mes, cu nan conclusionnan, ta mustra Minister Wever cu e ta robes. Ley di Reino HOFA ta limita nos autonomia. MEP ta spera cu pa e minister tambe awor por bin un punto final si e ley ta limita of no nos autonomia y pa e acepta e conclusionnan di Raad van State y Raad van Advies, pero tambe di MEP, PPA, Parlamentario de Meza, profesionalnan experto y sindicatonan, cu HOFA ta mina nos autonomia. “HOFA ta un limitacion di autonomia di pais Aruba”, Wever-Croes a enfatisa.
