ORANJESTAD (AAN): Presidente di Comision Permanente di Husticia di Parlamento di Aruba, parlamentario John Hart,
a anuncia cu den luna di juni lo tuma lugar un reunion di comision dedica na e tema di capacidad den e cadena hudicial di Aruba. Pa e encuentro aki Hart a invita Minister di Husticia pa duna claridad y informacion tocante diferente reto cu e sistema di husticia ta enfrenta actualmente.
E anuncio ta sigui despues cu Hart a presenta preguntanan formal na Minister Arthur Dowers tocante e capacidad di autoridadnan den Cuerpo Policial Aruba y Recherche pa investiga adecuadamente e denuncia y kehonan presenta door di ciudadano. E preguntanan aki a provoca reaccion di Ministerio Publico, Alto Comisario y Ministerio di Husticia, loke segun Hart ta confirma cu e preocupacion ta uno legitimo y merece atencion serio.
“Durante reunionnan di IPKO na Tweede Kamer den Den Haag, e tema di Estado di Derecho a wordo discuti ampliamente. Tambe ex-Procurador General di Aruba, mr. Bote ter Steege, a enfatisa cu capacidad suficiente den institucionnan clave manera Polis y Ministerio Publico ta esencial pa garantisa un sistema di husticia cu ta funciona debidamente,” Hart a declara.
Segun e parlamentario, Aruba ta enfrenta diferente desafio den su cadena hudicial y e ta considera cu ta un responsabilidad di Parlamento pa evalua criticamente e situacion y mantene institucionnan cu autoridad publico skerpi y responsabel.
Ademas di e cuestion di capacidad pa atende y investiga denuncianan, Hart a indica cu e reunion di comision lo presta atencion tambe na e preocupacion creciente tocante delincuencia hubenil. Segun e parlamentario, tin señalnan alarmante cu cada bes mas hoben bou di 15 aña ta envolvi den acto criminal manera atraco y otro delito serio.
E reunion di Comision Permanente di Husticia lo ofrece un oportunidad pa haya un bista amplio di e estado actual di e cadena hudicial y pa identifica medidanan concreto cu por contribui na un sistema di husticia mas fuerte, eficiente y confiabel pa Aruba.
