Minister Wyatt-Ras a haci bishita di trabou na De SGR-Groep na Corsou

ORANJESTAD (AAN): Diabierna 5 di juni Minister di Salubridad, Asunto Social, Cuido di Adulto Mayor, y Maneho di Adiccion, Sra. Mervin Wyatt Ras, a hasi un bishita di trabou na De SGR-Groep.

E bishita a enfoca riba cera conoci, intercambia conocemento y explora oportunidadnan pa mas cooperacion riba tereno di cuido specialisa y rehabilitacion. Hunto cu Hunta di Directiva, consistiendo di Director General Carlanne Emerenciana y Director di Servicionan di Sosten Linda Cijntje-Gout, y e team di maneho di De SGR-Groep, Minister a bishita diferente localidad di e organisacion.

Durante di e recorido, Minister Wyatt-Ras a haya un bista amplio di e servicionan cu De SGR-Groep ta brinda y di e sosten cu diariamente ta ofrece na clientenan cu diferente nesesidad di cuido y sosten. E programa a inclui entre otro un bishita na Revalidatiecentrum Curaçao (RCC), Curaçao Orthotics & Prosthetics (COP), Therapeutische Peutergroep (TPG), e facilidadnan residencial di Fundashon Verriet, Zorgboerderij De Waarborg y Kas Noord Zapateer Fase 2.

Un momento special durante e bishita tabata e encuentro cu e clientenan di Aruba cu ta biba na Fundashon Verriet. Actualmente 26 cliente di Aruba ta biba y haci pasadia na Fundashon Verriet. Durante un encuentro caluroso, Minister Wyatt-Ras a haya e oportunidad pa combersa cu varios cliente. Como muestra di aprecio, e clientenan a presenta Minister Wyatt-Ras cu un obra di arte traha na man y un presentacion di poesia, haciendo e encuentro aun mas bunita.

Ademas, e Minister a haya chens di experiencia di cerca con e clientenan ta pasa nan dia den e diferente facilidadnan di Fundashon Verriet. El a asisti na algun actividad di pasadia, a papia cu clientenan y personal, y por a mira con e guia, e tratamentonan y participacion ta tuma luga den practica. E interaccion directo aki a duna un bista valioso riba e impacto cu e servicionan tin riba e bida diario y bienestar di e clientenan.

E bishita aki a ofrece un oportunidad pa un intercambio valioso di experiencia y experticio. Directiva di De SGR-Groep ta wak bek cu hopi aprecio riba e bishita di Minister Wyatt-Ras. E combersacionnan habri, interes genuino y e atencion pa cliente y empleadonan a haci e bishita di trabou un encuentro inspirativo y valioso pa tur envolvi.

Minister Wyatt Ras tambe ta hopi satisfecho cu e bishita: “Nos ta mira atras riba un dia valioso y inspirativo. Nos a keda impresiona cu e calidad di servicionan, e facilidadnan y specialmente pa e pasion, experticio y dedicacion di e empleadonan. Tabata maraviyoso pa mira con bon e clientenan Arubano ta haya cuido, sosten y cuanto atencion ta duna na nan bienestar. Nos ta gradici De SGR-Groep pa e recepcion, hospitalidad caluroso y cu De SGR-Groep tabata habri pa comparti nan trabounan cu nos.” 

Nota pa redaccion (no pa publicacion):

Foto 1: Minister Wyatt-Ras cu clientenan di Aruba na Salsbachweg

Foto 2: Regalo di clientenan di Aruba pa Minister Wyatt-Ras

Foto 3: Minister Wyatt-Ras cu clientenan di Aruba na Kas Noord Zapateer 2

Foto 4: Bishita di Minister na COP