Tur trahador di Gobierno tin derecho riba medida basico igual --- *Derecho di maestronan enfrente derecho di mucha y di pais --- *For di 2009 Simar tabata tin un deber sagrado enfrente futuro
ORANJESTAD (AAN)- Awe bista di Aruba ta dirigi riba e decision di Hulanda pa loke ta trata e rebaho den entrada di maestronan di school.
Si Hulanda dicidi cu e ta baha e rebaho di salario di maestronan di school, di tur miembro di Simar, e resultado lo ta cu mester deshaci di tur medida cu a tuma den cual e entrada di otro trahadornan di Gobierno a bay atras.
Tin diferente punto cu mester tene na bista pa enfrenta e decision di Hulanda awe, cu lo ta uno historico.
Gobierno a base di e acuerdo cu el a firma cu Hulanda mester tuma medida cu ta mishi cu tur trahador di Gobierno pero tambe ta crea un base legal pa trahadornan di empresa priva reclama nan derechonan, cu por resulta den reduccion di personal den sector priva.
Awe e prome asunto di importancia ta, cu si Hulanda deshaci di rebaho di salario di maestronan di school, e mester tene na consideracion cu tur otro trahador lo reclama esaki tambe.
Pues tur medida cu a tuma riba salarionan di trahadornan por bira motibo pa accion legal di otro sindicatonan di trahadornan di Gobierno tambe, ya cu ley no conoce preferencia.
E punto central den henter e asunto aki ta, e papel cu enseñansa y asina educadornan di muchanan ta hunga den un comunidad cu a pasa den situacionnan inespera cu a afecta e bienestar di muchanan.
Sin duda e muchanan di awe a conoce experencianan cu e generacionnan di mucha den historia moderno di Aruba no a conoce pasobra ni Segunda Guera Mundial a haci loke Covid-19 a haci cu schoolnan y muchanan na Aruba.
Por papia hasta di un situacion traumatico pa e generacion actual di mucha, cu tin problema pa comprende kico ta pasa cu nan y den cierto casonan a bira hasta victimanan di mentenan perverso durante lockdown.
E sector di educacion a sufri mundialmente, manera instancianan oficial ta reconoce, y awor mester crea un situacion pa debolbe stabilidad na e sector, di cual futuro di Aruba ta depende.
Pa mayornan e situacion di Pandemia tabata un problema pa loke ta trata educacion na school.
Awor problemanan laboral ta crea un confusion caminda mayornan mester mira ki hora mester baha muchanan na school, si tin school y kico lo pasa.
E pregunta grandi cu ta keda pa DIARIO ta, pakico e sindicato di maestronan di school no a actua for di e prome momento cu nan entrada a wordo pone na peliger?
Na 2009 ora a reduci BBO, sindicato no mester a studia cifranan y bati alarma den comunidad pa loke esaki lo nifica?
Na 2014 ora Hulanda a bati na porta, Simar no a exigi Mike Eman bandona Fort Zoutman y splica Aruba kico a pasa cu placa di Aruba.
Ora Mike Eman a bisa cu “orguyosamente lo paga e debe”, sindicato Simar no a realisa kico e pago di e debe lo nifica pa Aruba cu ni sikiera por a mira su futuro despues di desastre di un proyecto Citgo cu tambe a wordo permiti na Aruba?
Como representante di un sector sumamente importante pa comunidad, Simar mester a lanta para y no sostene Gobierno Mike Eman for di 2009 ora cu aplauso si sindicatonan manera Simar, Mike Eman por a hiba Aruba na e estado di bancarota.
Awe mester bini trankilidad den Enseñansa di cual futuro di Aruba ta depende. Un trankilidad cu sigur mester ta presente den e situacion di incertidumbre di pandemia y di guera mundial.
Aruba henter ta den un situacion dificil, cu no a wordo crea dor di e actual Gobierno pero segun tur cifra y honestidad dor di Gobierno Mike Eman cu sindicatonan tambe a permiti haci loke e kier, aunke asina el a mata futuro di muchanan, di generacionnan cu mester paga (manera Mike Eman a splica claramente) e debenan cu Mike Eman a laga atras!
