Minister Presidente Wever-Croes ta splica: --- *Y bacterianan den awa cu ta haci nos coralnan daño
ORANJESTAD (AAN) – Minister Presidente a informa cu e siman aki, Parlamento a trata e rapport CARMABI, riba e estado di Aruba su coralnan.
E mandatario a splica cu esaki ta un investigacion cu e Instituto CARMABI a ehecuta na añanan 2019 y 2020 y e rapport a wordo presenta na Gobierno, na Januari 2021.
“Den e rapport aki, Instituto CARMABI di Corsow, a enfoca riba con e estado di nos coralnan ta. Y pakico esaki ta importante? Pasobra ta nos coralnan ta traha e santo cu nos tin riba nos beachnan.
Si nos coralnan no ta den bon estado y no traha e santo, anto nos beachnan no ta keda den e estado cu nan ta; y nos beachnan, na e momentonan aki, ta e unico pilar economico cu nos tin. Pesey ta asina importante pa nos cada un cu ta biba aki na Aruba, y nos bishitantenan, pa proteha nos coralnan mas hopi cu ta posible”, Minister Presidente a señala.
E dignatario a sigui splica cu CARMARI a mira tres aspecto cu ta importante pa e bida bao di lama, specialmente pa e coralnan. E prome ta pisca: ki tipo di pisca tin, por ehemplo e “parrot fish” cu ta un bon pisca pa mantene e nivel di Aruba su coralnan bon.
“Riba e tema aki di pisca Aruba a score bon. Esaki ta algo cu ta positivo y nos tin cu keda cuide. E di dos area cu CARMABI a mira, ta e coralnan mes, cuanto coral nos tin. Akinan nos a score ‘mas of menos’. Nos tin coral, nos tin coral nobo tambe, pero nos tin hopi destruccion di coral. Cada boto cu ta tira anker un caminda, ta kibra coral. Nos tin tambe sushedad cu ta drenta den awa cu ta daña nos coralnan; y riba esaki, nos mester bay pone mas atencion”, e dignatario a señala.
E di tres aspecto, ta cu CARMABI a constata cu tin cierto bacterianan den nos calidad di awa. “No bacteria cu ta haci hende malo, pero bacterianan cu ta haci nos coralnan daño y esey ta algo cu nos tin cu pone atencion, y eynan Aruba no a score bon”, e mandatario a indica. Den otro articulo DIARIO lo sigui elabora riba e tema interesante aki, cu Minister Presidente a trece dilanti.
