ORANJESTAD (AAN) – Minister di Enseñanza, Endy Croes a splica, den conferencia di prensa unda el a presenta e “tussen rapport”, cu e doorlichting a saca un potret di con enseñanza na Aruba ta actualmente.
E mandatario a splica cu basa riba e rapport aki, a bin diestres recomendacion, riba cada tema, kico Aruba tin cu bay haci. Y den e proceso cu nos ta bay encamina pa e 13 recomendacionnan ey, pone atencion na nan, pa por mehora e sistema di enseñanza, den su totalidad.
E mandatario a menciona e recomendacion number 1 ta e parti di e registratie system voor kengetallen; di number 2 te cu 8 ta e mehoracion di enseñanza den su totalidad, y di number 9 te 13 ta reforza e sistema di enseñanza.
Minister Croes a indica cu e manera con a reparti e rapport aki ta hopi cla; tur e diestres puntonan cu nan a skirbi den e rapport por reconoce nan di un of otro manera, pasobra den e reunionnan cu e stakeholders cu e tambe a forma parti di nan, ora cu tabata formando gobierno, e ta corda cu den e diferente sesion di enseñanza, cu ainda no tabata sa cu e lo tin e honor di carga e cartera aki, e posicion cu diferente stake holder a presenta y laga atras por escrito, tin hopi di e puntonan cu ta bin bek awo. E mandatario a menciona cu e rapport aki ta keda cla na final di November.
Den e rapport aki, e dignatario a indica, diferente di e 13 recomendacionnan, asina cu el a haya e cartera di enseñanza y deporte, el a scoge cierto di e puntonan aki cu a bin bek den e rapport. Por ehemplo, e parti di data, pa por bin cu un “data central” na unda cu tur scol ta transferi nan datanan mediante un interfase pa Departamento di Enseñanza y Inspeccion di Enseñanza por tin esaki.
Minister Endy Croes a bisa cu nan a cuminza canaliza esaki caba, y tin algun scol cu ta mas atrasa cu otro, y ya a duna inicio na un di e recomendacionnan cu a bin den e tussen rapport. Otro tema na cual a dedica un seccion completo den e rapport ta e leynan anticua, unda nan ta papia di Landsverordening di enseñanza preparatorio y basico, nan ta papia di “beroepsonderwijs” cu no tin Landsverordening, entre otro aspectonan.
E pakete aki lo wordo revisa completo, e mandatario a señala. E leynan anticua lo wordo moderniza, y esnan cu falta lo wordo traha cu nan “memorie van toelichting”. Ya caba a pone un Comision encarga unda un profesor di Hulanda, specificamente den enseñanza cu plataforma na Aruba di tur su dienstnan lo cuminza trek esaki.
Ta conoci cu traha riba ley ta tuma su tempo, cu e ta un proyecto cu lo por duna un aña y mey, pero e kier mira atras aki cuater aña, cu gobierno a cumpli parcialmente cu hopi di e puntonan aki, cu ta importante den e vision y plan di maneho, enseñanza di transicion, cu el a presenta recientemente, di forma virtual.
