DVG a ahusta su protocol pa Covid-19 pa scolnan
ORANJESTAD (AAN): Awor cu scol ta den su di casi tres siman cu a inicia por tuma nota cu ya caba e invitacionnan pa anochi di mayor ta wordo manda.
Un di e temanan cu ta bin riba mesa como prioridad ta e protocolnan pa loke ta Covid-19.
DIARIO tin entendi cu awor a cuminsa pidi e mayornan copia di e certificado di vacunacion di Covid-19 di e alumno pa asina por tin un registro di esnan cu a vacuna y cu a haya tur dos dosis di e vacunanan den cada scol.
Parce cu esaki ta bay den man di Departamento di Salud pa asina por tin un mihor control riba e hobennan cu ta vacuna contra Covid-19 den cada institucion.
DVG a ahusta su protocol pa Covid-19 pa scolnan unda ta stipula na ki momento un alumno mester bay den cuarentena. Pa haci esaki mester registra tur alumno cu a vacuna cu tur dos dosis y pa esaki mester registra e certificadonan.
Mas informacion relaciona cu e maneho aki lo bin sali na cla den e dianan aki ora cu mas y mas mayor wordo poni na altura riba e procesonan aki cu ta tumando lugar.
Ainda no ta conoci cu esaki ta conta solamente pa scolnan cu ta cay bao di SKOA so of si ta conta pa tur scol secundario en general. Locual si ta conoci ta cu ta conta pa hobennan mayor di 12 aña cu ta bin na remarca pa haya e vacuna contra Covid-19.
