Despues cu Parlamento 2009 pa 2014 a pusha Aruba den catastrofe
- Ley di Contabilidad a wordo kibra den proyecto cu ta riesgo pa hende?
ORANJESTAD(AAN)- Como matutino di Aruba, DIARIO tin e deber pa indaga den tur documento y sigui entrega prueba pa accionnan wordo tuma pa pone un fin na e riesgonan pa bida y bienestar di e Pueblo di Aruba.
Con grandi e peliger cu a wordo crea cu e proyectonan di Bo Aruba ta pa Pueblo di Aruba, awe ta haya tur prueba na momento cu salud di Pueblo di Aruba ta na discusion.
No por ta posibel cu Hospital caminda salud y bienestar di Pueblo ta wordo sirbi, surgi e situacion cu a surgi pasobra e ehecuta un proyecto cu Pueblo no tin placa pa paga y cu no a wordo prepara manera tur ley di Aruba ta exigi.
DIARIO awe ta presenta e rapport prepara pa Algemene Rekenkamer Aruba, cu ta e vigilante di e forma cu ta gasta placa di Aruba y cu ta pone enfasis riba e responsabilidad grandi cu politiconan cu na nomber di Pueblo ta dirigi e pais, mester practica tur momento ora ta trata Salud di Pueblo.
Loke a pasa cu Hospital di Aruba cu tabata parti di un proyecto cu ni Parlamento ni Hulanda por a controla manera mester tabata pasobra e ta parti di proyectonan cu ta cay pafor di presupuesto di e pais, no por wordo acepta dor di Aruba.
Awe Parlamento cu den otro constelacion pero semper como Parlamento cu ta continuidad, a permiti catastrofe bati na porta di Salud Publico di Aruba, tin e deber di pidi Ministerio Publico pa duna recomendacion riba loke a pasa cu placa di Aruba cu a wordo pusha den peliger total.
Parlamento na momento cu a habri porta pa Gobierno Mike Eman ehecuta e proyectonan Bo Aruba, a trapa riba e principio di control di placa di Aruba, awe tin e deber sagrado pa cera porta pa e desastre aki ripiti den futuro.
Salud di Pueblo, cu ta e bienestar mas grandi di Pueblo ta na peliger.
E rapport di Algemene Rekenkamer Aruba ta mustra bon cla con mester gasta placa di Pueblo loke sigur no a pasa ora pa hunga wega politico, contra tur regla y norma a pasa e proyecto hospital nobo, cu ta pone bienestar y bida di e Arubiano directamente na peliger manera a keda proba.
Awe husticia mester wordo haci cu Pueblo di Aruba cu mester paga sumanan gigantesco pa loke ta menasa su bienestar.
Prueba mester wordo entrega cu ley pa uno ta ley pa tur y cu Gobierno di Mike Eman a abusa di e confiansa cu Pueblo den eleccion a duna nan pa traha pa Pueblo y no pa crea monstruo pa e pais.
Parlamento di Aruba tin e deber pa yama un reunion extra ordinario y discuti loke a pasa y pidi Husticia pa cuminsa cu e investigacionnan necesario pa mira kico a pasa cu placa di Pueblo y con por tene Gobierno Mike Eman responsabel oficialmente pa e forma cu awe cuido medico ta pasa den e problemanan serio cu e ta enfrenta.
Bienestar y bida di Pueblo no por ta juguete politico y awor e momento a yega pa Parlamento como representacion oficial di Pueblo, duna contenido na democracia y actua despues cu Parlamento a scoge den pasado pa ganashi politico y no pa garantianan cu ta mishi directamente cu e bienestar, e bida y salud di e Arubiano, cu ta central di Constitucio, di base legal!
