No pone bida di autoridad y organisacion di rescate na peliger --- *Un disturbio ta mishi cu fondo di lama te e nubia di mas halto --- *Mundialmente campaña contra accionnan peligroso den tempestad
ORANJESTAD (AAN) — Mientras mundo medico ta haci esfuerzonan grandi pa scapa bida di hende cu ta sufri di enfermedadnan grave, comunidad mundial ta lucha cu un fenomeno, cu aparentemente ta basa riba un necesidad pa hende sinti su mes interesante.
Pa haya publicidad hende ta subi estatuanan of pone nan mes den situacionnan dramatico, cu ta exigi pa autoridad drenta den accion pero tambe pa otro hende pone nan bida na peliger pa rescata nan.
Ayera Aruba a bati alarma pa un tormenta a base di un sistema cu tabata acerca e region di Caribe.
Si e loke tabata duna indicacion di ta inicio di un depresion tropical no muri na caminda pa Aruba, e pais directamente lo mester atende cu un situacion sumamente serio pa cual mester bati alarma grandi.
Representantenan di autoridad, miembronan di organisacionnan cu mester brinda asistencia den tur situacion peligroso, mester prepara nan mes pa confronta cualkier peligro cu por surgi y duna asistencia cu ta wordo solicita.
Kico esaki ta nifica? Comunidad ta conciente di loke ta wordo exigi di personanan cu un trabou cu no ta permiti nan busca siguridad y proteccion di nan cas pa nan mes y nan famia na e momentonan cu peligro grandi bati na porta?
Cuanto Arubiano na momento cu alarma mester wordo bati pa horcan, no mester tuma e paso mas dificil di nan bida, cu ta bandona nan cas y nan famia pa bay traha pa nan pais?
Cuanto hende cu for di momentonan cu nan tende cu tin peligro na caminda, den nos tempo moderno ta bay cumpra saconan grandi di chips, boternan di bebida pa sinta mira kico lo pasa den loke pa nan ta aventura?
Medidanan ta wordo tuma dor di comunidad pa scapa bida di tur cu busca problema pa nan mes tambe.
Actitud iresponsabel rond mundo ta aumenta.
No ta dedica atencion na loke tin den cas pa come y bebe durante pasashi di un tormenta. No ta evita di bebe alcohol na momento cu mester por drenta den accion si situacion exigi esaki.
Ta bay hunga Tarzan, habri porta of subi caya pa mira con matanan grandi ta basha abou, trafico ta pega den rotonde y miembronan di gruponan di rescate y autoridad mester bay pone nan bida na peliger.
Un tormenta tropical no ta un sistema cu solamente ta produci biento fuerte. Si tur cu ta kere cu den peligro nan mester busca aventura, uza nan cabez y busca informacion, nan ta topa cu e realidad di un horcan, e dinamismo di naturalesa cu ta manifesta su mes di e nubia di mas halto te fondo di lama.
Con ta bay landa ora un tormenta ta pasa den vecindario di Aruba y ta afecta e coriente di lama, cu ta anuncia presencia di un disturbio?
Lama semper a confirma cu tin mal tempo na caminda. Mal tempo, cu no ta e dushi yobidanan cu nos conoce, pero ta dinamismo natural cu hende no por controla.
Dinamismo cu ta afecta e fondo di lama, cu ta pone olanan desaparece, pa despues bolbe cu furia y destrui tur loke tin den nan caminda.
E forsa di naturalesa hamas por wordo controla dor di hende, cu tin e deber pa proteha su mes y su comunidad.
Bobo ta e persona cu den yobida torencial ta dicidi di subi caya inunda mientras biento fuerte ta hunga cu loke e ta comberti den proyectil.
Mundialmente advertencia nobo ta sali pa aventureronan cu ta pone bida di hendenan cu mester traha den situacionnan peligroso, na peliger.
Aruba a bati alarma di tormenta. Afortunadamente nos ta biba den un region, cu manera atrobe tin indicacion, no tin e dinamismo presente pa sistemanan tropical crece.
E garantia, ningun hende por duna den esaki mientras mester realisa cu Aruba como isla ta mucho mas vulnerabel cu un pais grandi.
Gruponan di rescate, Polis, Cuerpo di Bombero, gruponan di rescate den aire, riba tera y na lama, boluntarionan y profesionalnan den tur ramo, ta prepara pa alarma cu por wordo bati den temporada di horcan.
Awe nan bida nan ta pone na riesgo pa un comunidad, cu tin e deber di coopera y evita tur peliger cu por evita y cu por pone bida di otro na peliger.
