Menasa di sistema tropical na entrada di santana di horcan

Ola tropical a scohe ruta di gran reto entre Atilantico y Pacifico --- *Despues di Aruba ta spera e cuna di horcannan fuerte di Caribe --- *Ruta di sistema den Caribe ta mara na e hecho cu mundo ta rondo

ORANJESTAD (AAN) — Ayera a cera cu un ola tropical cu a anuncia su yegada na region di Caribe y ta den centro di atencion.

E atencion cu e ta ricibi ta debi na e hecho cu e ta un peliger directo pa e parti Noord di Venezuela y pa islanan dilanti costa di Venezuela.

E sistema a nace den e Zona di Convergencia Intertropical, caminda bientonan ta topa y ainda ta basta Zuid na Juni y cu poco poco hunto cu solo lo subi bay Noord.

E sistema a drenta noticia despues cu e expertonan di National Hurricane Center cu hunto cu tur servicio meteorologico den e region ta atende cu temporada di horcan den Atlantico, a descubri e area di nubia meymey di Oceano Atlantico cu tabata move den direccion di Caribe.

E bientonan sosteni, pues no rafaga di biento, cu tabata presenta nan mes, a spierta pa nacemento di un sistema, cu por a drenta region di Caribe como Tormenta Tropical y por a bira horcan na caminda pa America Central.

Interesante tabata cu e sistema no tabata subi, manera hopi bez ta nota den e casonan aki, pero a mantene su mes hopi abou y casi a parce di lo bay dal den e costa Atlantico di Venezuela.

Na ultimo momento por a mira cu el a cuminsa bay poco halto, manera por a wordo spera tambe debi na e efecto special cu tin na entrada di region di Caribe, caminda e “efecto Coreolis” ta manifesta su mes.

Na entrada di sistemanan den Caribe, hopi bez por nota cu nan ta bay poco Noord. Nan ta parce di evita e entrada skerpi di Region di Caribe.

E hecho cu ta bira evidente cu ora nan ta biaha West nan ta subi, ta debi pues na e resultado cu mundo ta rondo.

Na e momento cu e sistema tabata a acerca region di Caribe ayera, e tabata practicamente un depresion tropical y tabata falta poco pues pa wordo clasifica como tal ora el a yega e region, caminda e lo topa cu un reto grandi, cu ta e Santana di Horcan, manera nan ta yama e ruta cu e sistema lo sigui.

Ta e menasa cu e entrada Zuid di region di Caribe ta forma pa sistemanan tropical, ta haci cu nan ta sigui un ruta mas Noord normalmente.

Den e caso aki tabata dificil debi na presencia di otro sistemanan cu tambe tabata un estorbo pa e ola tropical, cu a cruza un Oceano Atlantico favorabel pa sistemanan tropical desaroya.

E pronosticonan cu a wordo duna pa Aruba ta tene debido  cuenta cu e resultado pisa cu e costa di Venezuela tin pa e sistema cu no por subi y mester lastra riba tera na e parti Noord di Venezuela, loke ta kibra forsa di e sistema.

Un sistema tropical ta haya bida riba lama sigur cayente. E temperatura di lama na entrada di region di Caribe tambe ta uno di e motibonan cu a cualifica e parti di entrada di Caribe te ora pasa Aruba, como santana di horcan y otro sistemanan tropical.

Ayera a cambia e pronosticonan pa mustra cu e sistema tin chens di bira horcan ora e pasa Aruba y bay direccion di America Central pa pasa asina den un parti di lama Caribe mas cayente y cu mas espacio pa e bira horcan y hasta yega Oceano Pacifico.

Na Aruba, Prome Ministro Mr. Evelyn Wever-Croes, a base di informacionnan concreto cu e ta ricibi di Servicio Meteorologico, cu ta traha cu National Hurricane Center, ta tuma decisionnan pa proteha comunidad di e resultadonan di pasashi di e sistema, di cual ayera tardi no por a duna un centro defini ainda y tabata uno di e motibonan pa cual e no por a wordo considera ainda oficialmente Depresion tropical ni Tormenta Tropical.

Ta bon pa sigui informacionnan oficial cu ta wordo duna continuamente a base di presencia di e fenomeno den Caribe cu menasa pa Aruba.