ORANJESTAD (AAN): E pronostico di e maltempo cu kizas lo haya e nomber di Tropical Storm Bonnie,
ta mustra cu e lo ta pasando Diaranson anochi pa Diahuebs mainta hopi cerca mes di Aruba. E calculo ta cu banda di 2:00 am e lo ta hopi cerca di Aruba.
Pero como cu e cobertura di nubianan ta masivo, esey nifica cu ya for di ocho ora prome, lo por cuminza haya momentonan di yobida duro, cu lamper y strena, y biento fuerte.
E “cono di probabilidad” di e ruta di e centro di e ciclon, ta pone cu e lo por pasa djis algun kilometer panort di Aruba, of e lo por pasa net riba Aruba, of e ta pasa pazuid di e isla, net entre Aruba y Venezuela. Of e lo ta pasando riba Venezuela.
- •• Si e pasa panort di Aruba, e isla lo haya alivio como cu biento lo bay ta menos fuerte e ora ey.
- •• Si e pasa net riba Aruba, e isla lo haya biento pisa for di tur direccion y lo ta fuerte.
- •• Si e pasa pazuid di Aruba, e isla lo bay haya hopi biento fuerte y lama mucho mas bruto, cu por causa hopi daño.
“Nos ta hopi preocupa pa erosion di nos beachnan, mirando cu e lo pasa net banda pazuid entre Aruba y Venezuela,” Ministro President Evelyn Wever-Croes a bisa.
Di Dialuna caba, Departamento Meteorologico di Aruba (DMA) a emiti un ‘Small Craft Advisory’ pa doño di tur boto chikito pa evita di subi lama, y si ta posible hasta saca bo boto for di awa.
Segun Rino Hermans di Bureau Rampenbestrijding Aruba, e daño aki lo ta den forma di erosion fuerte di e beachnan banda pazuid y tambe banda pabao di Aruba!
A ser mustra cu Aruba Tourism Authority tambe ta den e Team di Crisis cu ta den preparacion pa cualkier eventualidad. Y e hecho cu e peligro di erosion ta hopi grandi, pesey lo bay keda vigila esaki. Lama bruto por bin kita tur e santo blanco.
