ORANJESTAD (AAN): Manera cu DIARIO a informa caba den edicion di Diamars, Nacionnan Uni a emiti un rapport cu ta papia idioma cla y raspa pa Gobiernonan di henter mundo compronde.
Ningun region, ningun poblacion, ningun lama riba Tera ta safe di e dañonan cu actualmente ta wordo provoca pa e cambio di clima. E subimento di nivel di lama, e olanan di calor, securanan y tormentanan “sin precedente pa hopi siglo” ta wordo asocia “sin duda algun” na e actividadnan humano cu ta causa calentamento global, segun e ultimo evaluacion cientifico di e Panel Internacional di Expertonan, esta IPCC.
E rapport nobo aki, “basa riba fisica”, mester sirbi den teoria como un guia pa maneho di clima. E grupo di 240 cientifico di 66 pais a stipula cu e cambio di clima causa pa e ser humano a yega na un punto cu “temperatura global lo sigui subi te cu mey-mey di Siglo 21” y cu e meta di Acuerdo di Paris pa contene e calentamento aki cu 2º of 1,5º Celsius lo wordo sobrepasa e siglo aki “solamente si haci reduccionnan profundo den emision di CO2 y otro gasnan di greenhouse den siguiente decadanan”. E rapport aki a wordo encarga pa e gobiernonan registra cu Nacionnan Uni pa bin cu e mihor prueba cientifico riba e estado y modificacion di clima riba e planeta aki.
Un di e contribuidornan di e rapport, e director ehecutivo di Carbon Project, esta Pep Canadell a resumi esaki di e forma aki: “Ningun hende ta safe. Nos a comproba cu calentamento y e acidificacion di oceanonan ya caba a yega mas di 2.000 meter hundo.” Y el a agrega cu “no tin ningun duda cu e calentamento acumula te asina leu ta bin di actividadnan humano. IPCC nunca antes a yega di bisa esey asina categoricamente.”
E rapport ta expone cu “e influencia humano a altera e clima na un ritmo sin precedente den ultimo 2.000 aña.”
Y mientras cu e clima ta cambia, “nos lo experiencia episodionan cu ta sin precedente den magnitud, frecuencia, periodo y localidad,” esta nan lo ta mas grandi, mas frecuente, y na momento y lugarnan unda nan no tabata socede antes.
Canadell ta enfatiza cu e rapport aki ta “pasa di e abstracto pa loke ta tangible, esta cu loke directamente ta afecta hendenan.” Securanan cu lo empeora produccion di agricultura, tormentanan cu ta causa inundacion, olanan di calor cu ta mata miles di hende, y crea candelanan di mondi den temponan y na latitudnan inimaginable.
Practicamente tur e regionnan geografico den cual Nacionnan Uni ta dividi e mapa di mundo, awor a mira con calor extremo a empeora y e relacion di e cambio aki cu e actividadnan humano. Como 41 di e 45 regionnan ta den zona cora. E region Mediteraneo a empeora y cu e probabilidad cientifico halto cu esaki ta debi na calentamento produci pa humanonan.
Tambe 19 region mundial ta sufriendo di mas awacero torencial. Ningun region a mira e riesgo aki bira menos, y falta dato den 18 otro.
Encuanto e secura, agricultura, y ecologia, e analisis a splica cu tin poco acuerdo of poco data procedente di 32 region. Di e resto, tur di nan menos uno a mustra un panorama peor compara cu 15 aña pasa. Entre esnan cu a mira mas secura, ta confirma cu e probabilidad ta grandi cu e fenomeno aki a wordo empeora pa e ‘contribucion humano’, ta e region Mediteraneo.
Pero no mester bay leu. E aña aki mes a bin nota cu e di dos lago di mas grandi di Bolivia (despues di Titicaca), a converti su mes den un desierto, y expertonan ta convenci cu no por bay bek patras tampoco. E lago Poopó tabata un fuente di bida pa hopi tempo desde antaño pa esnan cu ta pisca y goza di su awanan abundante y cu tabata yuda cu cultivo na su oriya. Pero awor por mira cu ta djis boto y bicicleta frustia a keda atras unda antes tabatin awa.
E lago Poopó a bira victima varios decada largo di hende cu ta usa su awa pa necesidadnan regional di agricultura, pero naturaleza no a yuda cu suficiente awacero pa asina el a keda na nivel aceptable. Awor e ta asina seco cu tin poco chens cu e lo recupera bek.
Aunke e crisis di clima ta un fenomeno planetario, e ta impacta di forma diferente dependiendo ta ki area di mundo ta wordo observa. Hecho ta cu hopi lugar a bin nota un aumento den secura y asina pronostica un aumento di peligro pa candela cu un calentamento di 2º Celsius (acepta pa e Acuerdo di Paris).
Hecho ta cu paisnan tin di prepara pa un combinacion indeseable di temperaturanan extremo y menos awacero, terenonan seco, y kizas subida di nivel di lama.
