Helen Mohamed presidente CVA: - *HOH ta yen di pashent cu stroke
ORANJESTAD (AAN) — Helen Mohamed, di Fundacion CVA Aruba (Atake Cerebral/Stroke), den conferencia di prensa convoca pa Fundacion Pa Nos Grandinan, Club Kibrahacha, a hiba palabra y cuminza expresando cu ainda e tin e privilegio di ta presidente di e fundacion aki, cu ta purba di haci algo na prevencion di pashentnan cu a haya ataca cerebral.
El a comenta cu ainda tin hende na Aruba cu ora nan scucha cu un hende a haya stroke, esey kiermen cu el a haya un atake di curazon. El a aclarea cu CVA ta nifica “Cerebro Vascular Accidente” pues gewoon un accidente cu un hende ta haya den su cerebro.
“Ta jammer cu aworaki nos no por drenta den cas di hende pa duna informacion, na esnan cu ta keda cas hunto cu e pashent despues cu e bay cas.
Awendia cu e pandemia aki e pashentnan ta bay cas hopi mas lihe cu antes, pasobra hospital tambe, ora cu bo ta un pashent asina, nan kier pa e yega cas mas pronto posible pasobra nan mester di nan cambernan pa e pashentnan di stroke cu ta drenta. Mi por bisa cu mi mes mester a drenta hospital, no pa stroke pero mi a haya un TIA (Transient Ischemic Attack) y mi a wordo interna un dia. Y docternan a haci tur test den dos pa mi sali lihe. Ora cu e specialista a atende mi, e di cu mi cu e no kier wak mi eyden pasobra eyden ta yen di pashent di stroke y mester di e camanan” Helen Mohamed a comenta.
El a agrega cu el keda contento, naturalmente, pasobra el a haya e testnan cu normalmente ta tuma alomenos tres luna, of hasta añanan, awendia pa haya nan, el a haya den dos dia.
El a indica cu ta un pro y un contra pa e pashentnan cu ta bira malo, pasobra nan mester di cama y hopi biaha hospital mester traha hopi mas duro pa resolve loke e pashent ey tin pa e bay cas.
“Solamente e pashentnan di nos ta bay cas cu hopi limitacion; nan no por move, nan no por cana, y bo ta haya bo e ora ey na cas cu pashentnan cu mester di yudanza. Loke ta Fisioterapia ta bira hopi limita, e famia ta lubida cu ora cu e pashent a wordo yuda na Hospital e fisioterapia tin un continuacion na cas, y ta bon pa un hende bay y wak kico ta pasando cu e pashent ey na Fisioterapia pa sigui cune na cas” Helen Mohamed a señala.
El a sigui splica cu comemento tambe tin di haber cu un pashent di stroke. Ora cu CVA ta bay cas di un pashent mester mustra nan cu tin cambio pa e pashent, pasobra si puntra con e ta come, jammer pa bisa pero si tin pareha den cas cu ambos ta traha, hopi biaha e pashent ta come fast food; of un hende a cushina pe, pero e no sa con e persona ey ta cushina y kico el a pone den e cuminda pe.
“Nos ta contento cu nos por a uni, eigenlijk, danki na e dia cu nos a traha cu Aruba Doet, cu nos a uni cu e fundacionnan y cu e grupo cu a bay cu nos a haya chens di haci pregunta y mi ta spera cu a bay cas cu un par di miho informacion”, señora Mohamed a subraya.
