Arte di Palabra un medio importante pa uzo den enseñansa

E balor di “Arte di Palabra”  - ORANJESTAD (AAN):  Fundacion Lanta Papiamento (FLP) ta di opinion cu Arte di Palabra ta un evento sumamente importante cu ta duna prueba di e balor cu Papiamento tin pa nos pueblonan.

            E preparacion di e alumnonan pa Arte di Palabra ta un parti masha importante den desaroyo di dominio di idioma. Gramatica, vocabulario, e habilidadnan scucha, papia, lesa, skirbi, ta bira masha agradabel pa e alumno, ora e por practica tur esey mientras e ta traha cu su idioma cu creatividad, desaroya pensamento profundo y critico hunto cu su docente y coleganan, busca mas informacion tocante su topico, discuti tocante su obra y e obra di su coleganan, duna y pidi argumento, coregi y refina su forma y estilo di pone pensamento riba papel, busca y descubri e forma y e palabranan adecua pa expresa algo, varia su vocabulario. Tur esaki y hopi mas ta parti di e curiculo di idioma en general y di Papiamento en particular. Ohala tur scol por inclui e forma aki di traha cu idioma den nan practica di les.

            Banda di tur esaki Arte di Palabra ta aporta grandemente na formacion personal di e hobennan: e siguransa, firmesa y orguyo cu nan ta demostra riba escenario ora nan ta recita nan poema of conta nan storia, ta remarcabel. Esta un talento e hobennan aki tin, talento cu lo a keda scondi si nan no a haya e oportunidad aki cu Arte di Palabra a duna nan. E actividadnan rond di Arte di Palabra ta agrega balor na e curiculo di Papiamento. Ohala tur scol avansa por considera Arte di Palabra como indispensabel den nan curiculo.

            Loke ta hala atencion tur aña atrobe, ta cu e obranan di e finalistanan ta trata tema hopi profundo, cu ta obliga e audiencia scucha cu atencion y reflexiona.

            Arte di Palabra ta un intercambio cultural masha importante mes entre nos tres islanan. E enfasis ta riba tur loke e tres islanan aki tin en comun: nos Papiamento, nos cultura di conta cuenta y recita, nos historia. E hobennan di ABC ta duna prueba di e posibilidadnan cu Papiamento como idioma di cultura ta duna nan. E nivel halto di expresion cu e hobennan a demostra, ta den bo idioma materno so bo por logra esey.

            Papiamento ta grandi. Papiamento ta nos idioma, ta nos orguyo, ta nos derecho. P’esey stim’e, uz’e bon y promov’e. Ta di nos e ta!