Con hende por vota pa Mike si ora el a gana eleccion el a bay sconde
*Falta poco dia pa Quanten y Eagle entrega nan decision na Aruba
*Falta poco dia pa scandalnan Refinernia y di tereno pone Mike core
ORANJESTAD (AAN) — Aruba ta rumbo pa uno di e eleccionnan cu hasta sin cu el a wordo adelanta, ta bira historico hasta si e pandemia di Covid-19 no a presenta.
Na 2017 tabata imposibel pa expertonan mes por a conclui, kico lo a pasa cu Aruba durante e temporada di gobernacion den cual Mike Eman a nenga di fungi como Prome Ministro.
E accion di Mike na 2017 hamas por wordo perdi for di bista ora papia di un persona cu kier presenta su mes como candidato pa bira lider di Aruba, despues cu el a nenga di bira Prome Ministro na 2017.
Pio ainda. Mike Eman a nenga di drenta Parlamento caminda e tabata sa cu problemanan cu el a crea pa Aruba lo a spart for di otro.
Pa personanan cu tabata consciente for di 2017 di loke Mike Eman a laga atras den gobierno, tabata un bofon cu el a bay cera su racha di eleccion na e brug di Balashi caminda pueblo a paga pa e por a canta Happy Birthday tambe.
Tabata e ultimo bez cu Mike Eman por a pone Pueblo di Aruba baila riba su musica, cu a destrui Aruba manera instancianan oficial di Aruba a trece dilanti.
Mike a logra cu e bom cu el a laga atras no a rementa den su man pero den man di Evelyn Wever-Croes, cu a enfrenta e situacion como un lider y a tuma medidanan cu mester a tuma pa evita cu Aruba lo a zink.
Ora Mike a mira cu Evelyn ta nabega e barco Aruba na e unico forma corecto, el a disparce pa despues di basta tempo bolbe pa trata di destabilisa Aruba cu manifestacion sin por a logra.
Na 2020, manera rapportnan oficial ta demostra Aruba a cambia e saldo negativo di e cifranan di e pais pa un saldo positivo na momento cu e Pandemia a presenta.
Evelyn a actua y a evita cu awe Miles di Arubiano no ta cu nos mas. Na mes momento Evelyn a sigui duna pueblo animo pa cana bay dilanti y a presenta un Master Plan pa e forma cu futuro lo mester bira.
2020 cu ta bira sinonimo na e pio desaster cu Aruba a conoce durante un siglo, a cera cu Aruba confrontanto e posibilidad pa dos compania bin establece nan mes riba e tereno di refineria, caminda Citgo tambe a bira fracaso di Mike Eman.
Awe DIARIO ta biba alerto y mester mira continuamente den dos direccion. Pa loke ta trata e partido di Mike Eman, mester keda pendiente kico ta bay pasa cu e rapport di Refineria di Aruba cu ta mustra kico a pasa cu placa di Aruba.
Hunto cu e rapport di terenonan di Gobierno cu a manda cantidad di hende directamente liga cu Mike Eman prison, awor tin e rapport di Refineria di Aruba cu violacionnan di ley y asuntonan di placa cu ta sumamente preocupante.
Husticia mester dicidi den e casonan aki cu ta mishi cu AVP cu semper a bisa cu su dirigentenan ta hende experto.
Di otro banda DIARIO ta pendiente pasobra cualkier momento e decisionnan di dos empresa Quanten y Eagle LNG mester drenta pa asina Prome Ministro Evelyn Wever-Croes prome cu eleccion por bisa Aruba kico ta bay pasa cu e economia pa cual e ta construi un infrastructura duradero.
Esaki ta e motibo pa e nivel mas baho di politica contra Wever-Croes, manera DIARIO a adverti.
Ta tristo cu un partido cu a logra haya tanto voto manera AVP, awe por baha te na politica di mas sushi pasobra su lider a faya y aparentemente AVP no por bisa Mike Eman cu for di 1986 ta baila tango politico, cu ta su momento pa bay cas.
