Na Savaneta lo tin hopi arte y cultura riba 18 di maart

ORANJESTAD (AAN):  Diasabra tin un evento na Savaneta en conexion cu 18 di maart. Lo celebra e Dia di Himno y Bandera na Savaneta cu hopi arte y cultura.

            Entrada ta gratis y lo tin diferente cos pa haci y mira.  Lo tin oportunidad pa bisti diferente trahe cultural pa e bishitante di e evento por saca potret cu ne. Lo tin un exposicion di piesa grandi di mosaic den tema di Aruba.

            Tambe e bishitante por escoge pa crea su propio piesa di mosaic. Lo por traha un coaster cu un diseño di por ehempel e isla Aruba of un indjan. Por traha un copi of canica di mosaic tambe.

            Un concepto nobo cu kier presenta na e evento di Dia di Himno y Bandera ta traha e bandera di Aruba di mosaic. Esaki ta un bunita actividad pa haci den famia.

            E artistanan local cu ta brinda pueblo un evento di Dia di Himno y Bandera den tema di Arte y Cultura ta Merveline y Mike Geerman, artistanan specialisa den e tecnica di mosaic.

            Orario di e evento ta 9:00-15:00. Y e evento ta tuma lugar na Shoco Garden na Savaneta.