ORANJESTAD (AAN): Minister Glenbert Croes a tene reunion cu directiva di "Dialogo Tripartite Social Laboral" (DTSL) pa asina prepara e plan di accion pa e siguiente reunionnan cu lo bay tuma luga.
Presente na e reunion aki tabata sr. Tito De Cuba representando e Gremionan Comercial, Hubert Dirksz representando e Gremionan Sindical y Sabine de Groot representando Gobierno di Aruba.
Minister Croes a indica cu e reunion aki tabata uno positivo na unda a delinea e plan di accion pa e proximo simannan , premirando un reunion di DTSL cu mas representantenan di gremionan en general pa mitar di April.
Dialogo Tripartite Social Laboral ta un plataforma di consulta y dialogo cu Minister Glenbert Croes a institui den su prome periodo como Minister di Labor, conforme e exigencianan di International Labor Organization (ILO). Esaki ta e plataforma unda Gremionan Comercial, Sindical y Gobierno ta bin hunto pa delinea y aproba cualkier proposicion cu por tin riba mesa e momento ey. E prome congreso di DTSL a tuma luga 29 di April 2019 riba cual dia unanimamente a aproba e ley di ARBO cu ta pa garantisa salud y siguridad den e entorno laboral di e trahador.
