En conexion cu 55 aniversario di Meals on Wheels:
ORANJESTAD (AAN) – En conexion cu celebracion di e di 55 aniversario di Meals on Wheels, diasabra dia 25 di November awo, lo tuma lugar na Club Caiquetio, na Paradera, un evento yama “Food Extravaganza & Auction”, di 4.30 or di atardi te 8’or di anochi.
Center Valerie Connor Meals on Wheels, ta coordinador di e evento aki. Asina a wordo splica pa Sue Faulknert, Mike Faulknert, Fundraisers for di Meals on Wheels, cu a bishita DIARIO en compania di nan mascota Sasha.
Aruba Methodist Circuit ta sponsor e evento aki, cu tin e meta di recauda fondo pa Meals on Wheels, door di e “silent auction event” cu ta ofrece servicio di restaurants, articulonan pa Pasco, gift duna pa restaurantnan, paña, zapato, arte, aparatonan electronico, articulonan domestico, cuido dental, chiropractor, salon di beyeza, balanan di baseball autografia, joyas, mascota, y mucho mas.
Entretenimento ta a cargo di Lady Dj, Ricky Thomas, Nico & Lee Connor, y Christ Church Praise Team. Tin skina pa mucha cu playground pa mucha 0-4 aña y un “bouncy castle”.
Lo tin na benta diferente tipo di cuminda, manera bamigoreng y nasigoereng cada un cu dos sate sticks, tuna fish balls, cu sauce creole, aroz, funchi y banana, turkey, ham y mucho mas. Tambe snack manera kroket, pastechi, loempia.
