KRALENDIJK: Diamars anochi, Centro di Operacion Maritimo (MOC) di Wardacosta di Caribe Hulandes,
a ricibi alarma di e Capitan di un lancha, cu a bay pega riba barancanan na Lac Baai na e banda pariba di isla di Bonaire.
Segun e Capitan a manda informacion, cu e lancha a yega demasiado cerca di costa, y consecuencia di esey ta cu e lancha a pega, y a cuminza haya un buraco tambe den e boto, y debi na esey e lancha a cuminsa yena cu awa.
Mesora Centro MOC a pone e Multisiciplinaire Maritieme Hub Bonaire (MMHB) na altura di e situacion di emergencia, y nan a actua mesora.
E Helicopter di Wardacosta tambe a lanta vuelo, pa bay presta asistencia. E avion Dash-8 di Warda Costa a cuminsa bula eybanda pa vigila e escenario usando Camera FLIR cu ta mira den scuridad.
Ora cu e Helicopter a yega riba e lancha, nan a baha cabuya y asina a hisa bek e dos personanan cu tabata abordo y coriendo riesgo si acaso e lancha sigui yena cu awa y sink. E dos personanan aki a wordo poni safe na tera na canto di Lac Baai, y aki Polis di Bonaire a tuma nan over.
