Na Aruba tambe a recorda e di 180 aniversario di e Independencia di Republica Dominicana

ORANJESTAD (AAN) – Na Plaza Juan Pablo Duarte, na Oranjestad, a tuma lugar e celebracion di e di 180 aniversario di e fecha di Independencia di Republica Dominicana,

diamars di e siman aki, dia 27 di Februari. DIARIO ta ofrece un texto cortico di e ceremonia interesante aki.

Minister Glenbert Croes, titular di e carteranan di Labor, Energia y Integracion, a hiba palabra, den representacion di Gabinete Wever Croes. E dignatario a expresa cu pa su persona tabata un gran honor ta presente e dia aki riba Plaza Juan Pablo Duarte, hunto cu e personal diplomatico y residentenan Dominicano presente den e ceremonia di e 180 aña di e acontecimento cu a culmina cu e Independencia di Republica Dominicana. E mandatario a pronuncia un discurso basa riba e gran historia aki, y a felicita e pueblo Dominicano en general y e residentenan Dominicano na Aruba, pa kendenan e dignatario a mustra gran aprecio pa nan hermandad cu nos pais Aruba.

Seguidamente, señor Luis Eludis Perez Delgado, Consul General a hiba palabra, ken a expresa, na prome lugar, palabranan di gradicimento pa su Coleganan di Cuerpo Consular, cu tabata presente cu un actitud di solidaridad cu ta bal mas leu cu loke e mente por pensa. Tambe el a gradici un persona cu e ta mira como un sorto di faro cu ta alumbra e caminda di locual ta e labor di un Consul na Aruba. El a expresa cu ta un persona cu a laga marca na Aruba riba cual hopi cu a bin prome cu ne, a cana. El a menciona y a pidi pa bin dilanti na señor Savala, ex-Consul Dominicano na Aruba.

Tambe a gradici e solemnidad, respet y elegancia di Cuerpo di Bombero ora nan a hisa e bandera e simbolonan patriotico di Aruba y Republica Dominicana. “E garbo exhibi pa e magnifico Cuerpo di Bombero aki, ta digno di admiracion” Perez Delgado a acentua.

A tuma lugar un ofrenda floral y un acto cultural, manera por mira riba potret.