Inventario di problemanan medico causa pa Covid-19 ta crece - *Mas pashent diabetico y mas caso di cancer relata na Covid-19 - *Prijs di petroleo ta sigui subi den un crisis peligroso di cuido medico
ORANJESTAD(AAN)—Dos preocupacion grandi y sumamente serio tabata central ayera.
Mas y mas expertonan riba tereno di Salud Publico ta adverti pa e forma cu mundo ta proclama victoria riba Covid-19, cu ta keda un peliger grandi y mundialmente ta sigui causa morto.
Na paisnan grandi na Europa y na Merca, preocupacion grandi ta wordo expresa pa e forma cu mundo ta atende actualmente cu Covid-19 cu tin Cuido Medico den un situacion serio, mientras inventario ta wordo haci di e resultadonan concreto cu te awor Covid-19 ta produci pa futuro.
Lista di pashentnan cu ta spera pa haya cuido medico necesario, ta sigui crece y ta motibo serio pa preocupacion den sector medico na hopi pais.
Hospitalnan na Merca y na Europa ta sumamente preocupa cu e posibilidad cu un ola nobo di Covid-19 por presenta su mes na mundo, cu kier regresa na un normal, cu manera nan ta sigui insisti, no ta basa riba datonan concreto.
Personal di Hospitalnan, cu no por cu mas presion di trabou, ta parti di e panorama total na hospitalnan caminda pashentnan ta lucha contra morto produci pa Covid-19 y listanan largo di pashent no por haya tratamento cu nan mester na hospital.
Mientrastanto expertonan a descubri cu Covid-19 no solamente ta productor di Diabetis, pero ta productor tambe di cancer debi na e forma cu e ta ataca organonan humano.
Mas caso di enfermedad cu indirectamente ta wordo causa pa Covid-19 ta wordo confirma mientras tur instancia medico ta adverti cu awe mas cu nunca, hende mester coopera den e lucha contra Covid-19 sigur den un tempo di problema serio.
Un ola mas di Covid-19 no solamente ta crea mas problema di salud, pero produccion mundial no por cu mas shock na momento cu tur prijs ta sigui subi den e crisis petrolero cu ayera a conoce mas aumento di prijs di petroleo.
Informantenan preocupa ta mustra DIARIO cu e problemanan petrolero ta afecta pronosticonan mundial cu a wordo haci y por tin resultado serio pa hopi pais.
“E Pandemia Covid-19 ta sigui exigi placa. Gobiernonan mundialmente no por sigui sostene problemanan financiero den sector priva. Economia mester produci pero mester tene e peliger di Covid-19 na consideracion,” a wordo trece dilanti.
Ayera mundialmente prijsnan mas halto di petroleo a causa cu prijsnan a sugui subi.
Prijs di cuminda a sigui bay halto mundialmente tambe .
Diferente pais grandi ta papia awor di e posibilidad di inflacion cu lo afecta mundo na un momento sumamente dificil.
Mientras ayeranochi te na momento cu DIARIO tabata cera edicion di awe, prijsnan mundial di petroleo tabata sigui subi y informantenan a adverti pa resultadonan cu esaki por tin riba resultadonan economico.
Prijsnan mas halto lo afecta e cantidad di placa cu Pueblo por tin pa gasta y lo kibra pronosticonan comercial cu a wordo haci pa final di 2021.
Mester evita un “double shock” cu ta ola nobo di Covid-19 sigur na momento cu petroleo ta afecta produccion mundial, informantenan ta insisti.
