ORANJESTAD (AAN) – Den conferencia di prensa, Dialuna, Minister di Enseñanza y Deporte, Endy Croes, a duna di conoce cu prome cu el a drenta den e rueda di prensa aki, a reuni cu dos Inspector di Enseñanza di Hulanda.
E mandatario a splica cu nan ta e dos inspectornan cu ta trek e proyectonan di Landspakketten, cu ta Laurence de Kroeze y Eric Martijnse. E mandatario a referi na un reunion hopi ameno cual parti inicial ta “Kennismaking” y durante mas cu un ora nan a duna hopi splicacion tocante unda nan ta cu e proyecto di Landspakketten, e letter G, cu ta toca enseñanza. Nan tabata na Aruba na September, e mandatario a indica, y hunto cu Inspectie di Aruba nan a haci hopi bishita na stakeholders di scolnan, y a acumula hopi informacion.
Minister Croes a indica cu nan ta riba e trayecto pa ta den tempo, pa cu e doorlichting cu ta bay tuma lugar tanto na Aruba como Corsow y Sint Maarten, hunto cu Hulanda riba e proyecto di Landspakketen y nan ta di acuerdo cu e “timing”.
E dignatario a bisa cu el a haya informacion hopi mas profundo cu e tin cu laga ora nan formula (nan toezicht reportage) cu lo bin na final di October aki ta cla, y por premira cu e rapport final lo ta cla pa Maart of April di 2022.
Eyden lo bin hopi recomendacion pa cu e direccion di enseñanza na Aruba lo tin cu dirigi su mes. E mandatario a subraya cu, mas cu claro, e doorlichtingnan ta riba e parto di e “basis kwaliteit di onderwijs”, e aansluiting di enseñanza cu e mercado laboral, y tambe un bon doorstroming di un scol pa otro.
Tambe nan lo revisa e leynan cu ta anticua. E dignatario a bisa cu e sa cu tin un Landsverordening pa scol preparatorio, un pa scol basico, un pa voortgezet onderwijs., y no tin un beroepsonderwijs y tur esaki den e doorlichting lo bin na claridad, kico ta e pasonan cu lo mester wordo tuma pa asina coregi, traha mas eficiente, y cu tur nanishi den un direccion ta crea hustamente tambe, e paz y trankilidad cu gobierno tambe ta buscando den henter e sistema di enseñanza, unda tur hende por bay trabao feliz. “Bo ta lanta cu smaak di bay trabao, di bay duna mucha les, bo ta orguyoso di bo trabao, bo sa cu gobierno y e ministernan ta aprecia bo trabao como docente, como maestro, como dirigente, como bestuur, etc.,etc. Pues riba esaki tambe nos tabata tin un reunion hopi largo, Dialuna mainta, un bunita reunion, Departamento di Enseñanza y Inspectie a sostene nos den esaki, y e Project Leider di tur e Landspakket, Indra, tabata cu nos den e reunion aki. Pues un danki na henter e team y atravez di esaki lo a duna un update na trabaonan reciente cu a caba di tuma lugar”, Minister Endy Croes, Titular di Enseñanza y Deporte, a conclui.
