Directora di Bureau Sostenemi:
ORANJESTAD (AAN) – Directora di Bureau Sostenemi, señora Magaly Maduro, a expresa den entrevista cu DIARIO, cu otro punto cu e ta mira ta cu muchanan no ta wordo tuma na serio.
“Algo cu mi kier ta pa nos tuma e muchanan mas na serio. Ora un mucha bisa algo, wak kico e ta bisa bo. Ora un mucha ta bisa bo ‘mi no kier bay cerca tal hende, e ta dal mi of e ta sinta mi riba su scochi y mi no ta gusta’, scucha e mucha y puntre pakico no. Y si e duna bo indicacion cu eynan ta sosode algo, pasobra un mucha sa kico ta bon y kico no ta bon, kico ta aceptable y kico no ta aceptable, tume na serio”, Maduro a indica.
Señora Maduro a comenta cu tin un mucha di ocho aña cu yega di bis'e: “Tanchi mi no ta gusta bay cerca tal hende, pasobra ora e sunchi mi, mi lip cu su lip ta touch. Anto bo tin cu scucha e mucha e ora ey”.
Den un caso asina mester papia cu e mayor. E persona cu a hacie ta bay bisa cu e no a hacie, cu mucha a mal interpreta, cu ta un wega di man y ora e man a touch cu e pecho di e mucha of na su curpa un parti priva (por ehemplo), pues, scucha e mucha.
“Si e mucha bisa bo ‘mi no kier esey mas’ scuch’e y busca un otro solucion pa e mucha cu e no tin nodi di bay mas cerca e persona ey, of bin cu otro palabracion. Palabracionnan cu mi tin cu mi muchanan ta: ‘no laga hendenan sunchi na bo boca. Bo ta zak bo cabes, laga nan hole bo cabes of sunchi riba bo cabes, pasobra con cu nan move nan no ta mishi cu bo lips. Anto tur mucha cu mi duna e tip aki e ta aprecia esey”, señora Magaly Maduro, directora di Bureau Sostenemi a menciona.
El a agrega cu como hende grandi nos por yuda un mucha, pasobra nan no tin tur tools. Nan mente no ta asina hopi, of completamente desaroya pa bin cu e idea aki. “Pero nos como hende grandi, un mama, un tata of un hende ta wak pa e interes di e mucha, asumi bo responsabilidad”, señora Magaly Maduro, a remarca, y a señala cu gobierno tin su responsabilidad, bureau tin su responsabilidad, pero mayornan y comunidad tin nan responsabilidad.
