Ministronan di Aruba a reuni cu e fundador di Internet Archive

Brewster Kahle consehando riba biblioteca digital na Papiamento

ORANJESTAD (AAN): Prome Minister hunto cu Minister Xiomara Maduro y Minister Endy Croes, dialuna ultimo a reuni cu fundador di Internet Archive señor Brewster Kahle y un colaborador señor Chris Freeland, y hunto cu Director di Archivo Nacional señor Raymond Hernandez y Directora di Biblioteca Nacional señora Astrid Britten.

   Un topico hopi importante cu a delibera riba dje tabata riba digitalisacion y con pa yega na biblioteca digital na Papiamento cu e meta pa nos conserva nos idioma y haci’e accesible pa mas hende.

   Señor Kahle ta un figura pionero den preservacion y acceso digital. Señor Kahle ta un bibliotecario digital y fundador y director di Internet Archive. Internet Archive, estableci na 1996 ta un biblioteca digital gratis cu ta archiva documentonan di World Wide Web y ta haci nan universalmente aceptabel y accecibel pa tur hende y na tur parti di mundo.

  Bao di su liderazgo, Internet Archive a bira un di e bibliotecanan digital mas grandi y mas significante globalmente, incorporando un variedad amplio di material manera buki, website, musica, video, y hopi mas. Dedicacion di Kahle pa preservacion di herencia digital y promocion di acceso universal na informacion, a gana reconocimento y aplauso amplio den e terenonan di tecnologia, biblioteca y hopi mas. Señor Kahle tambe ta co-fundador di Alexa.

  Prome Minister ta gradici coleganan cu a atende e reunion interesante aki, Director di Archivo Nacional, Directora di Biblioteca Nacional y tambe señor Kahle y señor Freeland kendenan a trece informacionnan hopi importante y interesante dilanti. Lo sigui cu e combersacionnan con pa introduci e tecnologia aki y yega na un biblioteca digital na Papiamento.