Fundacion Diabetes Aruba a organisa un programa pa personanan cu diabetes tipo 2

ORANJESTAD (AAN): Fundacion Diabetes Aruba hunto cu Fundacion Movemento ta Bida ta organisando un programa di 12 siman di actividad fisico pa personanan cu diabetes tipo 2, 'Move cu Diabetes',

cu lo tuma lugar tur diasabra, cuminsando 20 di April te cu 6 di Juli na Cacique Macuarima Scol na Santa Cruz.

Charlene Leslie di Fundacion Diabetes Aruba a elabora cu e programa ta enfoca riba personanan cu tin diabetes tipo 2 caba. Si tin personanan cu tin pre-diabetes cu tambe kier participa tambe ta welcome, pero esaki ta mas pa esnan cu diabetes tipo 2.

E meta di e programa aki ta pa stimula movecion na un manera safe, cerca e personanan cu tin diabetes, pasobra movecion ta un parti hopi importante di e maneho di diabetes, conhuntamente cu e parti di medicamento y alimentacion, como tambe estilo di bida y animo. Esaki ta un bon oportunidad pa esnan cu tin diabetes por haya sa kico tur nan por haci y con esaki ta afecta nan salud general, cu no ta trata solamente di peso, sino e nivelnan di sucu y parti di condicion fisico.

Leslie a indica cu durante e programa, profesionalnan lo guia e participante, na unda nan tambe lo haci un pre-testing y post-testing pa asina nan por wak e diferencia siguiendo e programa.

Esaki ta e di dos programa di actividad fisico cu e fundacionnan a organisa. E prome a cuminsa na Januari y a termina siman pasa, na Savaneta y a conta cu 13 participante. Nan tambe a haya guia con pa sigui cu e programa despues di e 12 siman.

E idea ta pa sigui cu e tipo di programanan aki pa stimula esnan cu tin diabetes pa haci cambionan den nan estilo di bida y maneha optimalmente nan diabetes. Pa mas informacion por tuma contacto cu Fundacion Diabetes Aruba.