Mircla Nava, Relacionista Publico:
ORANJESTAD (AAN): Mircla Nava, Relacionista Publico di Stichting Monumenten Fonds Aruba a duna di conoce cu nan ta hopi contento di por anuncia cu nan a haya fondonan for di Hulanda pa nan ehecuta un proyecto di fotografia di monumentonan di Aruba.
Esaki nan ta trahando hunto cu un fotografo di Hulanda cu ta traha hopi cu Instameet via Instagram y ta comparti fotografianan di herencia cultural di Hulanda y ta bin trece parti di su experticio riba e tereno aki na Aruba, a bisa.
Nava a sigui bisa cu esaki ta un proyecto di dos aña largo den cual ta bay saca potret hunto di e monumentonan di Aruba. No solamente e monumentonan, pero e herencia cultural en general. Tambe loke ta intangibel.
Pa cuminsa cu e proyecto, ta inicia cu tres Instameets. Ta bay tin un dia 14 di Augustus, dia 17 di Augustus y dia 19 di Augustus. Ta trahando hunto cu partnernan local.
E prome Instameet di dia 14 di Augustus ta bay ta cu Museo Arquelogico y Stichting Rancho. Ta bay fotografia locual ta monumentonan di Rancho, di arqueologia y tambe ta bay siña un tiki mas riba musica, etc.
Dia 17 ta bay San Nicolas y ta bay fotografia 'Sunrise City' y dia 19 den bus lo bishita diferente monumento rond di Aruba y pa esaki ta trahando hunto cu Museo Cas Tan Tin y Fundacion Kapel Betania.
El a laga sa cu un Instameet ta un actividad caminda cu amantenan di fotografia (smartphone of camara) cu ta interesa den fotografia y den e herencia cultural, historia, den monumentonan, ta topa otro y di un manera divertido, agradabel ta combersa, intercambia ideanan, cana hunto, explora e monumentonan, fotografia detayenan pa despues comparti esaki via Instagram.
Por participa esnan cu tin algo di experiencia cu fotografia. Pa registra ta facil. Por bishita e pagina di Facebook di Stichting Monumenten Fonds Aruba of nan Instagram; Monumenten Fonds Aruba unda lo haya e link pa registra.
A enfatisa cu e cuponan ta limita pesey ta pidi pa registra mas lihe posibel. Cada actividad ta dura entre 6 pa 8 ora cu ta bay ta bezig. Ta inclui cuminda y e ta completamente gratis.
