Lisette Gomes di Fundacion Mi Voz Ta Bo Voz
- E organizacion ta focus riba prevencion
ORANJESTAD (AAN): Lisette Gomes di Fundacion Mi Voz Ta Bo Voz, ta mustrando cu e casonan social na Aruba ta aumentando. Pasobra awor tin acerca casonan di abuso di droga y combina cu violencia.
El a indica cu ta haya diferente caso cu no tin di haber ni cu abuso sexual di mucha, pero nan ta purba yuda te caminda cu nan por y guia nan atrobe te na e instancianan corecto.
Entre otro, Gomes a menciona abuso di droga, di alcohol caminda te hasta menornan di edad tambe ta yegando cerca nan, casonan di violencia domestico na cantidad.
E problemanan ta sigui drenta. Abuso sexual di mucha tambe ta sosode. Ta haya hendenan cu ta keha cu e leynan mester wordo cambia. Gomes a enfatisa cu no mester sigui focus riba ley. Mester keda focus riba e parti preventivo na scol. Esey ta sumamente importante pasobra eynan tin e muchanan tur dia.
Segun Lisette Gomes, awendia tin hopi mayor jong y esey ta hunga un rol caminda e mayornan ta jong, e wela tambe ta jong y cu por ta ainda no ta keda cas pa wak pa e mucha. Nan ta drenta relacion hopi lihe y nan ta confia e yiu na e pareha ora di bay traha of sali y ta resulta cu el a abusa di e yiu.
Norma, balor, confiansa, tur esaki ta importante. No ta solamente ley. E ta cuminsa na cas y si tur hende ta pone atencion na esaki por haci hopi.
Por ehempel, papiando di e muchanan cu ta gusta bay banda di e mallnan, si abo como adulto consciente, bo ta wak algo robes y aunke no ta bo yiu yuda of yama polis y avisa cu tin algo robes tumando lugar y na unda, a indica. Hopi biaha pa berguensa, mayornan no ta entrega keho.
