Fundacion Pa Nos Comunidad
- Tin mas ainda wardando pa haya yudansa
- Nan ta yuda di Scol Basico te Estudio Avansa
ORANJESTAD (AAN): Gabrile Marchena, kende ta Trahador Social di Fundacion pa Nos Comunidad (FPNC) ta splica riba e ayudo escolar 2023 pa 2024.
El a indica cu tur cos ta bayendo bon aworaki y nan tin 250 mucha registra y ta wardando mas pa wordo yuda.
Segun Marchena, e proceso ta cu unabes cu un mucha ta den necesidad pa articulonan di scol, mayornan hopi biaha ta tuma contacto cu e fundacion y tambe nan ta pasa cerca nan pa nan por pasa door di un 'screening' pa asina por evalua e situacion di e mucha.
Ta tene na cuenta tur e gastonan di e cas como tambe e entrada. A base di e evaluacion aki ta wak si en berdad e entrada no ta yega pa cubri e gastonan pa loke ta scol. Asina ta dicidi cu por yuda e mucha cu mester di esaki, a señala.
El a sigui bisa cu e fundacion mester prueba di entrada (salario), si tin bijstand y tambe pruebanan di gastonan manera recibonan di Elmar, WEB. etc, ID pa asina tin tur cos den 'file'.
Cada mayor of voogd lo haya un cita pa haci e 'intake', e screening, pa asina nan por yega na remarke pa ayudo, a indica.
Gabrile Marchena a agrega cu nan ta yuda muchanan di scol basico, secundario y e por bay te na EPI of Universidad. Pesey un 'financiele toetsing' ta hopi importante pa haci pa por defini en berdad cu e mucha ta den necesidad pa esaki.
FPNC sa yuda cu tasnan di scol, agenda, slijper, materialnan basico, calculator, entre otro. Tur cos tambe ta depende di e donacion cu e fundacion ta ricibi y e cantidad tambe cu nan por yuda.
Ta haci esaki tur aña hunto cu Caliente FM cual ta haci un radiothon pa asina tur esnan cu por entrega nan donacion, a bisa.
A enfatisa cu tur esnan cu mester ayudo mester registra den e proyecto y pasa den e proceso di evaluacion, di 'screening' y ora cu esaki ta wordo aproba por ricibi ayudo. Si e persona ta bin na remarke, e fundacion ta tuma contacto cu e persona pa busca e materialnan di scol.
E entrega di material semper ta tuma lugar e siman prome cu scol cuminsa y ya caba a cuminsa cu e yamadanan na esnan cu a bin na remarke, Gabrile a duna di conoce.
